Aserorterineq: Maskiinat sanaartornermi atortut uppisinneqartut
Sapaatip unnuaani Nuummi sanaartorfimmi aserorterisoqarpoq. Pisortaq paasissutissanik ujartuivoq.
Illoqarfiup immikkoortuani Qinngorpumi sanaartorfik sapaatip unnuaani aserorteriffigineqarsimavoq. Aserorterinermi suliffeqarfiit ilaat eqqugaasoq tassaavoq, AK Byggeteknik, tassanilu pisortaq Anders Kristiansen aserorterineq pillugu Facebookikkut paasissutissanik ujartuivoq.
Taassumami pissutsit qatsutivippai:
- Maskiinamik ingerlaarsimapput, taannalu uppissimavoq.
- Maskiina nutaajuvoq. Sapaatip akunnerinilu pingasuinnarni atornikuulluni, millionillu affaannik akeqarpoq, Anders Kristiansen oqarpoq.
Pisortap oqarnera naapertorlugu matuersaatit maskiinamiissimanngillat, pinerluuteqartulli allatut aallartissimavaat. Ataasinngornerup ingerlanerani maskiina iluamik napparneqarluni kivinneqassaaq, kingornalu ajoquserneri misissorneqassapput iluarsaanneqarlutillu.
Pisuussuteqartullu nassaarineqarnissaat, Anders Kristiansenip neriuutigaa.
Kalaallit Nunaanni Politiit nalunaarfigineqarsimanertik aamma sanaartorfimmiissimanertik uppernarsarpaat. Suliaq misissuiffigineqarpoq, pigaartut pisortaat Hans Peter Berthelsen oqaluttuarpoq.