Asasara biilertoq qimaasoq...

Oqaaseqaat, Mads Nyvold-imit, tusagassiortoq, Sermitsiaq:
Immaqa utoqqatsernissaq siullersaatillugu pissusissamisoorpoq. Nalulluinnarparami biilertutut qimaasutut taasinnaanerlutit. Immaqa sualuppallaaqaaq. Immaqa taamatut taaneqassagaanni aportittoqartariaqarpoq, napparsimmavimmut unittoqartariaqarpoq ajornerusumilluunniit.
Qujanartumilli uagut taama pinngilagut. Paniga pingasunik ukiulik imminullu annaateqqarpunga kingumut pisseriarama, pisuinnaat ikaartarfianni sukkasoorujussuullutit tikikkiartoratsigut.
Isumaqarsimagaluarpunga siusinaartorujussuullutit takusimassagitsigut. Tassami pingasunngornermi ualikkut nal. 16.46 aqqusinikkut imatorsuaq angallattoqanngilaq. Eqalugalinnguaniit Quassussuup Mannguani kaajallattarfiup tungaanut sukkaqalutit ingerlavutit. Paniga meeqqerivimmit aaqqammerpara. Pisuinnaat ikaartarfiatiguulerluta nangaariarpunga. Toyota-stationcar aappalaartoq 5-7 meterinik siuninniittoq kaajallattarfimmut pilerami kigaallarianngilarluunniit. "Eqalussuup kigutai", allagartarlu unilluinnarnissamik isumallit, biilertup soqutiginngilai. Sukkalisaaginnavilluni saneqquppoq.
"Ila tupinnaqaaq", mamiatsallunga eqqarsarpunga.
Qujanartumimmi taamaasiortartut qaqutigoortuupput. Illoqarfiit pingaarnersaanni biilertut amerlanerpaartaat pikkorissuupput aqqusinikkullu angalasut allat eqqarsaatigisarlugit.
Taamaattumik soorunami isumaqarsimavunga unissasutit. Paniga tasiorpara. Pisuinnaat ikaartarfiatiguulerpugut. Sisamik-tallimanik alloriarpugut. Unillutalu. Sunaanerpoq pissutigalugu takorusuppara takusimaneritsigut. Biilinnilli SUV-mik sølvitut qasertumik qalipaatilimmik bremserniarpasinngilatit. Uninngaannarpugut. Sukkanerit attatiinnarpat.
Pisuinnaat ikaartarfiat meterialunnguaannarnik ungasitsigilerit paasilerpara uninnianngivissutit. Tunuariapallappugut. Sukkaqalutit saneqqpputit.
Tamanna sukkasuumik pivoq. Panimma assa eqitaangaarsimagakku annerpoq. Assamma illuanik nammattagaa tigumiarpara. Taanna silaannakkoorpoq. Bilivilli saavanut tulluni.
– Dunk!, nammattagaq aporakku taamatut saviminertai nipeqarput, taassumalu imarai sialussiutit ukaliusallu anaana tupaallatsinniarlugu naasortaavut.
Takullatsiarpara saavani saninni issiasoq angut inuusuttoq. Taassuma isigaatigut. Taanna qanormitaava eqqarsarpa? Qanormitaava illit pillutit eqqarsarpa?
Nuup tungaanut aqquserngup illua'tungaani pisimasoq malugineqarsimagunarpoq. Biilit kigaallarrapput. Illit taamaasiunngilatit - aamma aporsillutit malugisimasuugaluarukkut taamaasiorunanngilatit.
Nuussuup tungaanut sukkalisaaginnarputit. Suaarnissalluunniit angumerinngilara. Eqqarsaaterpassuit niaqqunni takkussuupput. Ilumut takunngitsuuikkatsigut? Imaluunniit ajornerusumik. Soqutigitsaalluinnarpit. Pisuinnaat ikaarsarfiannit qimaariassasugut naatsorsuutigiinnarsimaviuk?
Assakaasuit naqinneri panimma nammattagaani kajortut takussaapput. Allaanngillat uumasup allanartup tumaasa naqinneri. Pattallugit piiarsinnaavagut, imaalu aseruinnarsimapput. Atisarfiatali illua aserorsimavoq. Soqutaanngilarli.
Uagut ajunngilagut.
Politiinut nalunaarutiginiarpakkit. Naluarali sumik unnerluutigissallutit. Normupladit ilisimanngilara, biilimillu illoqarfimmi atugaanerpaamik biilerputit, taamaattumik qanoq ittuuneranik oqaluttuarnissaq iluaqutaanngiaq. Tupassimaqigamali politeeqarfimmut aqqusaarpunga. Oqaatigineruniaannarluguli asfaltimik sulinikkut kaajallattarfimmi "eqalussuit kigutaasa" affai takussaanngitsut. Immaqa tamanna pissutigalugu uninnissat puigorsimavat.
Politeeq anersaaruluppoq.
– "Eqalussuit kigutaat" ajoraluartumik iluaqutaagunanngillat. Ilaasa soqutiginagit ingerlaannartarput, taanna oqarpoq.