Artukkerneqartut: Politiit tarnikkut ilungersunartorsiortinneqartarput

Nunami maani politiinut ikiorsiisussat ungasittupilussuarmiipput, aamma politiit sulinerat inuttut inuunerannut sunniuteqartaqaaq. Tamannalu tarnikkut annertuumik ilungersunartorsiortitsisarpoq, politiit kattuffiat politimesterilu oqaluttuarput.

Misissuisimanerup nutaap takutippaa, nunami maani politiitut sulineq tarnikkut annertuumik ilungersunartorsiortitsisartoq. Kalaalli Nunaanni Politiit Peqatigiiffianit isumaqartoqarpoq, politiitut sulinerup politiit inuttut inuuneranni ulloq unnuarlu initunera tamatumunnga pissutaasoq:

- Politiitut ilisimaneqarputit. Meeqqatit politiit meeraraat. Nuliat uiilluunniit politimut aappaavoq. Kikkut tamarmik politiitut angutitut arnatulluunniit isigisarpaatsit, sunngiffinni qanorluunniit ilioraluaruit politiiuvutit, Jesper Fleischer Kalaallit Nunaanni Politiit Peqatigiiffianni siulittaasoq oqarpoq.

Taassuma tupaallaatiginngilaa, politiit 9,5 procentiisa PTSD-mik atugaqarnerat 15 procentingajaallu stressernerat misissuinerup takutissimammagu. Kisitsisit pineqartut Danmarkimi suleqatigisanit annertunerujussuuppput.

Jesper Fleischerip aamma oqaatigaal, politiit suligaangamik kisimiittarsinnaasut:

- Ulloq unnuarlu politiiugaanni, ikiorserneqarnissaq tamatigut naatsorsuutigineqarssinnaaneq ajorpoq, ilaannikkooriarlunilu illoqarfinni mikinerusuni suligaanni ikiortissaqanngivittarluni, Jesper Fleischer oqarpoq.

Ikiortissat ungasittupilussuarmiittut

Politimesterip Bjørn Tegner Bayp Politiit Peqatigiiffianni siulittaasoq isumaqatigaa, pingaartumik Nuup avataani politiitut sulisunut tunngatillugu:

- Ikiortissat ungasittupilussuarmiinnerat eqqarsaatigineqartarpoq. Danmarkimi illoqarfimmi mikinerusumiikkuit minutsit 20-t ingerlaneranni ikiortissarsisinnaavutit. Maanili nunami ullut apeqqutaasinnaapput, Bjørn Tegner Bay oqarpoq.

Politimesteri aamma isumqarpoq, politiit tarnikkut ilungersunartorsiortinneqartarnerannut pissutaasoq, Danmarkimi suleqatigisanut sanilliullugu, Kalaallit Nunaanni politiit pinerlunnernut aalajangersimasumik sakkortuunut orniguttariaqartarnerat:

- Inummut ulorianartumik pinerluuteqartarneq, soorlu persuttaasarnerit toqutsisarnerillu, Danmarkimit pingasoriaammik sisamariaammillu annertunerusarput. Tamatuma saniatigut kinguaassiuutitigut pinerluuteqartarnerit quleriaammik annertunerusarput, Bjørn Tegner Bay oqarpoq.

Taassuma aamma erseqqissaatigaa, Kalaallit Nunaanni politiit pisunut aallaariaannarmik aallaasilinnut ornigussinnaasarnerat.

Assigiinngisitsineq unitsinneqarli

Kalaallit Nunaanni Politiit Peqatigiiffiat naapertorlugu, politiit ataasiakkaat sulinerminni pitsaanerusumik atugaqalissappata, Kalaallit Nunaanni politiinik amerlanerusunik pisariaqartitsisoqartoq. Tassannga aaqqiissutaasinnaasut ilagaat Danmarkimi politiit aningaasarsiaasa assigannik aningaasarsiaqartitsilernissaq:

- Assigiinngissitsisoqartuartillugu, Kalaallit Nunaanni politiitut ilinniagalippassuit politiinit soraartarput, Jesper Fleischer oqarpoq.

Politimesteri Bjørn Tegner Bay isumaqarpoq, politiit amerlanerulissappata, politiinut aningaasanik amerlanerusunik atuisoqassanersoq politikkerit aalajangingassarigaat.

Tarnip pissusaanik ilisimasalimmit ikiorserneqartarneq pingaaruteqartoq

Politimesterimit ukkatarineqarpoq, upalungaarsimanerup, politiinut misigisimasaminnit kingunerlutsitsisunut ikiorsiisussap sapinngisamik iliuaqutaasuunissaa. Tassani ilaatigut eqqarsaatigaai politiit meeqqat atornerlunneqarsimasut pillugit suliaqartartut:

- Naalagaaffiup Politiivisa tarnip pissusaanik ilisimasallit suleqatigilersimavaat, tassa Kalaallit Nunaanni Politiit Danmarkimi suleqatitik assigalugit, tarnip pissusaanik ilisimasalinni ikiorserneqarsinnaapput, politimesteri nassuiaavoq.

Powered by Labrador CMS