Arsummi qanoq pissava

Aningaasaqarnermut Naalakkersuisoq Vittus Qujaukitsoq maajip naalernerani Arsummi innuttaasunik ataatsimiititsivoq. Maanna parteeqataata, Inatsisartunut Folketingimullu ilaasortap Doris Jakobsenip aperaa Arsuk ikiorniarlugu pilersaaruteqarnersoq, tassa suliffissaaleqisut amerligaluttuinnarmata inuillu nutserarlutik.
Paragraf 37 naapertorlugu aperivoq.
Doris Jakobsen marlunnik apeqquteqarpoq. Siulleq tassaavoq Arsummi aalisagartassiisoqarnissaanut Naalakkersuisut pilersaaruteqarnersut, aappaanilu aperivoq Vittus Qujaukitsup Arsummut tikeraarnera kinguneqartinneqassanersoq.
Apeqqutinut tunuliaqutaavoq Arsummi suliffissuaq maajip naalerneraniilli matoqqasimammat, taamanikkut arnarlunniarneq unimmat.
– Aalisartorpassuit fabrikkimilu sulisut massakkut inuussutissarsiorfeqanngillat allanik aalisagartassanik periarfissinneqannginnamik.
– Sissami umiatsiaararpassuit uninngaannarput fabrikkilu ajoquteqanngitsoq matoqqalluni. Siornatigut arnarlunniarneq unikkaangat saarullinniarneq aallartittarpoq, massakkulli taamaattoqanngilaq naak Arsuup eqqaani saarulleqarluaraluartoq.
– Aalisartut allanik periarfissinneqanngikkunik upernaap tungaanut uninngaannassapput. Taamatullu inissisimanerup kingunerilereerpaa, ilaqutariit illoqarfinnut nussornerat, Arsuup inuerukkiartuinnarnera kioskillu namminersortup matuinnartariaqalernera. Soorunami taamatut ingerlaneq aalisartunik innuttaasunillu iluarineqanngilaq, taanna oqarpoq.