Arsummi aalisartunut aaqqiagiinngitsoqarnera illersornissamut ministerip ilisimavaa
Issittumi Sakkutooqarfiup Arsuup kangerluani aallaasinik sungiusartarnerat Arsummi aalisartut iluarisimaarinngikkaat, Aaja Chemnitz Larsenip (IA) ukiup affaata matuma siorna ilisimatitsissutigaa.
Sapaatip akunnerata siuliani aviisi Sermitsiaq allaatigisaqarpoq Issittumi Sakkutooqarfiup Arsuup eqqaani aallaaserlutik sungiusaraangata, Arsummi aalisartut aalisarfimminniit qimangutsitaasarnertik kamaatigigaat.
Aalisartulli naammagisimaarinninnginnerat illersornissamut ministeriaqarfiup ukiup affaani maanna ilisimasaqarfigereeraa paasinarsivoq. Sumiiffik tikeraareerlugu Aaja Chemnitz Larsen (IA) illersornissamut ministerimut Claus Hjorth Frederiksenimut apeqquteqaateqarpoq.
- Kaammattuutigaara Arsummi innuttaasut illersornissaqarfillu naapissasut, oqaloqatigiinnikkut aaqqiisoqarniassammat. Sulili naapittoqarsimarpasinngilaq, Sermitsiaq.AG-mut oqarpoq.
Aaqqiagiinnginnerup annertusinnginnissaa anguniarlugu nammineq misiliinialerpoq. Suliaq pillugu Aaja Chemnitz Larsen (IA) ministerimut apeqquteqaqqinnialersaarpoq.
Kangilinnguit ammaqqinneqarmata sumiiffik aallaasersornermik sungiusarfittut atorneqaqqittalerpoq, sillimaniarnelu pissutigalugu ingalassimaneqarnissaa piumasaqaataalluni.
Aalisartut kissaatigaat Arsuup kangerlua sakkutuunit sungiusarfiussanngittoq. Taakku arlallit Sermitsiamut oqaluttuarput soqqusaatsumik qimagoqquneqartarsimallutik.
Issittumi Sakkutooqarfik nalunaaruteqarpoq aalisartut sumiiffimmi aalisarnissamut pisinnaatitaaffeqarnerat ataqqineqartoq.
- Sillimaniarnermut tunngatillugu killeq qaangerlugu aalisartut pisoorsimasut naammattooraangatsigit umiatsiaaraq attaveqarfigisarparput aperalutalu illuarsinnaanersut. Taamaasiorsinnaanngippata soorunami ataqqisarparput, aallaasinillu sungiusarneq unitsikkallartarlugu, Martin S. Jakobsen, Issittumi Sakkutooqarfiup aqutsisoqarfiani pisortaq Sermitsiamut oqarpoq.
Allaaserisat aviisimi Sermitsiami, ataani pissarsiarisinnaasarni atuarsinnaavatit: