Arssarnerit millioninik arlalinnik naleqartumik isumaqatigiissuteqartoq
Arssarnerit sapaatip akunnerani kingullermi nalunaaruteqartoq Matu Securitymik pisiaqarsimalluni, sulisuni nutaat maanna sulisissinnaangorpai. Islandimi suliffeqarfik Ístak nunami atuarfiit annersassaannik sanaartortussaq 35 millioner koruunit sinnerlugit naleqartumik isumaqatigiissuteqarfigisimavaa.
Arssarnerit pisortaat Torben Nielsen, sapaatip akunnerani kingullermi Islandiliarsimavoq, Islandimi suliffeqarfimmik Ístakimik isumaqatigiissutini 35 millioner koruunit sinnerlugit nalilik atsioriartorlugu.
- Atsioqatigiikkatta attortilaarpunga. Isumaqatigiissummi annaagatsigut annernarsimaqaaq, Torben Nielsen oqaluttuarpoq.
Isumaqatigiissummi millionerpassuarnik nalilik danskinut tunniunneqarsimavoq. Arssarnerit qullersaqarfiata MT Højgaardip, Nuummi atuarfissap nutaap december 2019-imi suliarinnittussarsiuunneqarnerani Islandimi suliffeqarfik Ístak ajorsarfigisimavaa. Tamannalu pisortamit Torben Nielsenimit nuannarineqarpallaarsimanngilaq.
- Illoqarfimmi suliassap taamak annertutigisupsuliffeqarfimmut ikkussuisartumut tunniunneqarnera ilumikkerutigisimavara. Uagut inuiaqatigiillu eqqarsaatigalugit, taanna oqarpoq.
Bravida suliassamik isumaginnittussaasimagaluartoq
MT Højsgaardip akuerisaannginnerata malitsigisaanik danskit suliffeqarfiutaat Bravida, pilersaarutit malillugit innaallagissap aqqutaanik, sikringininik ruujorinillu isumaginnittussaasimagaluarpoq.
Kisianni Istak Bravidalu isumaqatigiissinnaasimanngillat, taamaammat Torben Nielsen qanittukkut sianerfigineqarsimavoq, tamannalumi naammagisimaarluinnarpaa.
- Ístakimi pisortap Karl Andreassenip sianerfigalunga aperimmanga, atuarfiliornissamut suli soqutiginninnersugut nuannaarsimaqaanga, pisortaq Ístakiip Arssanrerit suliaasamik annertuumik suliaqarsinnaaneranut tatiginninneranut nuannaaruteqartoq oqarpoq.
Juunip 30-ani Torben Nielsenip nalunaarutigaa, Arssarnerit Matu Securitymik pisiaqarsimasoq, taamalu sulisuni 45 procentit missaannik amerlanerulersimasut.
Ukiuni pingasuni suliaqarnissaq
Sulisut nutaat sulisutoqqallu taamaalillutik qilanaarisinnaanngorpaat, innaallagissamut aqqutilersuinissamiit nakkutilliisarnissaq, nunamilu atuarfiit annersassaata Nuummi sanaartorneqarnerani kallerisaarutinik ajasoornartunillu ikkussuinissaq.
- Naatsorsuutigaara tyvet missaannik sulisoqassalluta, aamma kingusinnerpaamik 2023-mi martsip qaammataani suliassap naammassineqarsimanissaanut piffissaliussaq malissinnaassallutigu, Torben Nielsen oqarpoq.
Arssarnerit atuarfiup tunngavissaanut atatillugu suliassaminnik aallartisalereersimavoq, maannalu suliassamut pilersaarut sulissutigineqarluni, pisortaq oqaluttuarpoq.