Arsaattartut kattuffiata AWG-mi angusarissaartut nersualaarpai
Kalaallit futsalertartut Arctic Winter Gamesimi pingasunik kuultinnallutillu ataatsimik sølvinnapput. Arsaattartut kattuffiata KAK-p arsartut takutitsinerat nersualaarpaa.
- Arctic Winter Gamesimi angusat kattuffimmiit angusat tulluusimaarutigaagut.
Kalaallit Nunaanni Arsaattartut Kattuffiata pisortaa Níke Berthelsen Sermitsiaq.AG-mut taama oqarpoq.
- Nunatsinni piukkunaatilippassuupput. Nunap immikkoortuini pissartanngorniuttarnerrit iluaqutaasorujussuupput, tassanilu piukkunnaatilippassuit pilersinneqarput. Angusat pitsaasut aamma illoqarfimmi timersoqatigiiffinnit aallaaveqarput, taakku tamarmik arsartartutik AWG-mut piareersarluarsimavaat, Níke Berthelsen ilisimatitsivoq, taassuma erseqqissaatigaa, timersoqatigiiffiit KAK-mut videonik nassiussisimasut, taamaalilluni sungiusaasup kikkut AWG-mut peqataanissaat takusinnaaniassammassuk.
Timikkut piumasaqaatit
Ilungersorluni sungiusarneq iluatsissimasoq, Níke Berthelsen oqarpoq.
- Unammisartutsinnut timigissarnikkut piumasaqaateqarnikuuvugut, unammisartunillu tamanna malinneqarsimasoq malunnarpoq. Tassani timersoqatigiiffinni sungiusaasut sulilluarsimapput, qaammatinilu arlalinni sungiusarluartoqarsimavoq.
- Arctic Winter Gamesimi sungiusaasut arsariaatsiminnut tulluartumik unammisartunik peqataatitsipput. Nunatsinni piukkunaatilippassuaqarpoq, ilaasortallu amerliartuinnarput, Níke Berthelsen oqarpoq.