kommunimut qinersineq

Arsaattartunut sungiusaasoq: Taamaammat politikkikkut sassarpunga

Tekle Ghebrelul nunanut allanut unammisartunut isikkammik arsaattartunut sungiusaasoq, Inuit Ataqatigiit tunuliaqutaralugit Sermersuumi kommunimut qinigassanngortippoq

Tekle Ghebrelul isikkammik arsartartunut sungiusaasoq, Inuit Ataqatigiit tunuliaqutaralugit Sermersuumi qinigassanngortippoq

Angutit isikkammik arsaattartut nunanut allanut unammisartuinut sungiusaasoq, Tekle Ghebrelul, kommunimut qinersinermut Inuit Ataqatigiit tunuliaqutaralugit Kommuneqarfik Sermersuumi qinigassanngortippoq.

- Imminnut politikeritut isiginikuunngisaannarpunga, taamaammat qinigassanngortinniarlunga aalajangerama tassanngaannartupilussuuvoq. Kisianni partii IA toqqassallugu ajornarsimanngilaq, inunnut qanilaartorujussuunera pissutigalugu, Tekle Ghebrelul Sermitsiaq.AG-mut oqarpoq.

Atuaruk: Partiit pingasuinnaat kommunini tamani qinigassanngortitsipput

Meeqqat inuusuttullu
Isikkammik arsartartunut sungiusaasup sammisaq ataaseq ingammik soqutigaa.

- Meeqqat inuusuttullu. Nunatsinni sumiiffinni assigiinngitsut tikittarnikuuakka, meeqqallu ineriartornissamut amerlanerusunik periarfissaqartariaqartut isumaqarpunga. Meeqqanut inuusuttunullu sinaakkutanik pilersitseqataasinnaallunga isumaqarpunga, Tekle Ghebrelul nassuiaavoq.

Atuaruk: Tv-imi quiasaarisartoq kommunimut qinigassanngortittoq

Pissusissanik malinninneq
Ineriartornerlu timersorneq aqqutigalugu pisariaqartoq taanna isumaqarpoq.

- Siullermik meeqqat atuarfiini timersornermut kulturi allanngortinneqassaaq. Pissusissanik malinnilluartoqassaaq, sammisanillu meeqqanut tamanut iluaqutaasussanik pilersitsisoqassaaq. Meeqqammi alapernaatsuupput, uagullu ikiuisussaavugut, taamaalillutik angorusutatik ujartortuarniassammatigit. Meeqqat inuusuttullu takorluukkatik ujartortuarsinnaasariaqarpaat, tunuliaqutertik apeqqutaatinnagu, Tekle Ghebrelul oqarpoq.

Apriilip sisamaanni kommunimut qinersisoqassaaq.

Atuaruk: Inuussutissarsiortoq ilisarisimaneqarluartoq politikkimut sanguvoq

Powered by Labrador CMS