Arsaattartoq Danmarkimi misilittagassarsiortoq
Nunanut allanut unammisartoq Kunuuteeraq Isaksen qaammatini sisamani Danmarkimiissaaq, Holbæk Sportsakademimi silami arsaalluni sungiusarnermi peqataasassalluni.
26-nik ukiulik Kunuuteeraq Isaksen Ilulissani arsaattartutut klubbini N-48 nunatsinni pissartaasut, qimakkallarlugit Sjællandimi unammisartuni Tusemi arsaattartunngorpoq.
Silami arsaanneq aallunnerullugu pikkoriffigilernerussallugulu tassaniikkallassaaq. Danskillu arsaannermi divioniini siunissami qaffassarusulluni. Kalaallit Arsaattartut Kattuffiata Holbæk Sportsakademi isumaqatigiissusiorfigeqqammerpaa, Kunuuteeraq Isaksenilu isumaqatigiissut malillugu maanna sungiusaqataasalerpoq.
- Sunniuteqarluartussaavoq ineriartorninnut qularnanngilaq, aamma periarfissinneqarnikuuvunga nunanut allanut sungiusaasutsinniik Holbæk Sportsakademimi ullaakkut sungiusaqataasarsinnaasunga. Silami arsaannermik nuannarisaqarluni kajumilersitsivoq, Kunuuteeraq Isaksen periarfissaq pillugu oqaluttuarpoq.
Inuusuttunut kajumilersitsissaaq
KAK aamma Holbæk Sportsakademip isumaqatigiissutaanni nunatsinni arsaattartut Holbækimi eqqaaniluunniit najugaqarlutik sungiusaqataasalersinnaapput, atuarneq sulinerluunniit pissutigalugu Danmarkimiikkallarnerminni. Isumaqatigiissummi qulakkeerniarneqarpoq nunatsinni arsaattartut ineriartornerunissamik periarfissaqartilernissaat.
- Isumaqatigiissutip siunertarivaa nunatsinni isikkamik arsaannerup nukittorsarnissaa silami aamma futsalimi aammalu nunatsinni arsaattartut nunatta avataani isikkamik arsartalernissaminnik periarfissiivoq. Inuttut, timikkut eqqarsartaatsikkullu ineriartorneq aammalu qaffasissumi unammisarnerni misilittagaqalernissaq. Tamanna kajumissaammik annertuumik tunisinngittoorunnanngilaq, KAK-imi allattoqarfimmi pisortaq Nísinguak' L. Geisler Sermitsiaq.AG-mut oqarpoq.
Arsaattartoq Kunuuteeraq Isaksen Danmarkimi suliutigaluni Tusemi klubbitaarpoq.
Inooriaaseq qitiulluinnartoq
Kunuuteeraq Isaksen nunatsinni silami arsaannermik futsalimilu arsaattartuuvoq. Danmarkimiinnerminili silami arsaannermik aallutaqarnerussaaq. Silami arsaannermi sungiusarneq nunatsinni unammillernartoqarpoq, ukiumut qaammatit sisamaannaat sungiusarnissaq periarfissaasarmat.
- Uanga silami isikkammik arsarneq nuannarinerullugu taamaattumik una periarfissaq tigulluarnikuuara, isumalerujussuuvoq kalaallit nunatsinnut aammalu uannut inooriaatsimullu allannguilluni, sungiusarnissakka aallunnerujussuuvakka maani dk'mi, aammalu nerisakka paarilluarnerulerlugit, Kunuuteeraq Isaksen oqarpoq.
Taanna ilisimatitsivoq arsaattartut nunatsinneersut sungiusariarnissamik soqutiginnittut saaffiginnittalereersut.
- Neriuutigivara kalaallit nunaani arsaatartut uattut misigisaqartut silami ukioq kaajallallugu sungiusartarusuttunik kajumilersitsinissallunga, ilaatigut aamma attaveqallattaaleqqapput misileerusulerlutik, Kunuuteeraq Isaksen oqarpoq.
Arsaattartoq Danmarkimiinnermini sanasuni sulivoq.