Arsaannermi oqaluttuarisaanermut ilannguttumik Kalaallit Nunaat unamminermini ajorsaqqalaartoq

Arsaannermi Kalaallit Nunaata nunanut allanut unammisartui Kosovop U21-mi nunanut allanut unammisartuinut tallimanngormat unammipput. Kalaallit angusaat tupaallannartuusoq, nunanut allanut unammisartunut sungiusaasoq Morten Rutkjær oqarpoq.

Kosovop U21-nut unamminermi Kalaallit Nunaat sinnerlugu aallarteqqaartut assimi takuneqarsinnaapput. Unamminermi Kalaallit Nunaat 0-1-mik ajorsarpoq.

Kalaallit Nunaata nunanut allanut unammisartui Kosovop U21-nut sungiusaatigalugu unamminerminni kalaallit 0-1-mik ajorsarput. Unammineq Tyrkiami ingerlanneqarpoq.

Aatsaat 75 minutsini unammereerlutik Kosovop 21-ni unammisartut aatsaat isertitsipput.

- Angusarput tupaallannartuuvoq, unammisatsinnummi pikkorilluinnartunut malinnaalluartorujussuuvugut, nunanut allanut unammisartunut sungiusassoq Morten Rutkjær Sermitsiaq.AG-mut oqarpoq.

Tulluusimaarpoq

Nunat tamalaat inatsisaat pissutaallutik unammineq takutinneqanngilaq. Unammineq malinnaaffigalugu qanoq issimanersoq nunanut allanut unammisartunut sungiusaasoq ima oqarpoq:

- Arsarluartorujussuuvugut, unammisartullu takutitaat tulluusimaarutigeqaara. Minutsini 20-ni unammereerneranni ingerlalluaqaagut, tassanimi unamminermi suli isertitsisoqanngilaq. Kiisa minutsit 30-t tikippagut suli isertitsisoqanngitsoq. Unammisut mumipput tamarmik suli isertitsinatik, eqqarsarpungalu ’susoqartoruna?’, nunanut allanut unammisartunut sungiusaasoq naammagisimaarinnilluartoq oqarpoq.

Kalaallit unammineq tamaat ataqatigiilluartut oqaatigaa.

- Arsariaaseq 5-4-1 atorlugu unammineq aallartipparput, Kosovop U21-ni arsaattartuisa isertitseriarnissartik ajornartorsiutigeqaat. Tupinnaqaaq taama arsarluartigisinnaagatta. Aamma immikkoortumi siullermi isertitsinissamut periarfissaqaraluarpugut, iserteriarneqartorli isinngitsoorpoq, Morten Rukjær oqaluttuarpoq.

Angusaq tupinnartoq

Unammisartut suleqatigiilluarput, sukkasuumillu saassusseriarnissaq unamminerup aallartinnginnerani isumaqatigiissutigisimallugu.

- Angusarput tupinnaqaaq, Europamimi inuussutissarsiutigalugu unammisartunut unammivugut. Unammineq sioqqullugu isumaqatigiissutaasut arsaattutta maleqqissaarpat, takutiinnarpaalu sukataarnikkut angusaqarluartoqarsinnaasoq. Nuannaaqaanga, aamma Kalaallit Nunaat sinnerlugu tulluusimaaqaanga. Unammisartunut pitsassuarnut malinnaalluarsinnaanerput angusaavoq tupaallannartoq, nunanut allanut unammisartunut sungiusaasoq oqarpoq.

Ataqatigiilluarlutik unammisut

Kalaallit anføriat, Karsten Møller Andersen, oqarpoq unammineq sakkortusimaqisoq.

- Ataqatigiilluartorussuuvugut. Unamminerni siullerni tunorliit midtbanemiittullu avissaangasarnikuupput, tamannalu pinngitsoortinniarlugu eqqartuinikuuvugut. Ataqatigiinnerujussuuvugut, suleqatigiillutalu, oqaluttuarpoq.

Karsten Møller Andersenip unamminermi takutitartik tulluusimaarutigaa.

- Aamma siullerpaamik anføriutinneqarpunga. Unammineq tamaat sukataarpunga, aatsaammi taama pikkoritsigisunut unammivunga. Unammisagut sukkaqaat nukittoqalutillu. Aamma angisoorujussuupput. Uanga 1 meter 86 centimeterisut angitigaanga, unammisagullu agguaqatigiisillugu taama angitigipput.

Ungasianit isertitsinerat uggorilaarpaa

Angusartik nuannaarutigaa, Kosovoli isertitsinera uggornartoqartilaarlugu.

- Ungasianngaanniit isertitsipput. Immaqa frisparkiliorsimasinnaagaluarpugut. Unamminermi naligiissimasinnaagaluarpugut, taamaammat isertitsinerat uggornalaarpoq. Taamaattoq unamminermi inissisimalluaqaagut, aamma isertitsereersut kinguaraluarluta nikalluutiginngilarput. Unamminerup aallartinnginnerani isumaqatigiissutigereerparput isertitsiffigitissagutta nakkassutigissanngikkipput, tamannalu iluatsilluaripput isumaqarpunga, Karsten Møller Anderdsen oqaluttuarpoq.

Unamminerit amerlanerusut

Nunanut allanut pikkorissunut unammeqqinnissartik neriuutigaa.

- Uagutsinnut iluaqutaassaqaaq unammeqqissinnaagutta. Una unamminerput alloriarneruvoq siulleq, neriuppungalu ukiumut arlaleriarluta unammisalerumaartugut. Ineriartornitsinnut iluaqutaarujussuassagaluarpoq, oqarpoq.

- Sapaatip akunnerani maaniinnitsinni immitsinnut qanillisorujussuunikuuvugut, aamma sungiusaasugut pikkoreqaat, sungiusarnigut tamarmik isumaqarsuaartarput. Aamma ilikkagaqarnikooqaanga, kiisalu siukkaajunnaarlunga tunuani arsartuulernikuuvunga. Inissisimaffertaara uannut tulluaqaaq, angivungami nukittullungalu. Maanna suli pikkorinnerulernissara anguniarlugu suli sungiusaqqissaanga, Karsten Møller Andersen oqarpoq.

Unamminermi Kalaallit Nunaat sinnerlugu aallarteqqaartut uani takuneqarsinnaapput:


Powered by Labrador CMS