Arsaannermi oqaluttuarisaanermi annguttoq

Kalaallit timersortartut Nunatsinni nunanilu allani angusarissaarput ukioq manna. Ukioq manna angusat pingaarnersaat atuarneqarsinnaapput.

Asii Kleist Berthelsenip toqqorsivimmiit assinga.

Ukiumi 2021-mi kalaallit timersortartut angusarissaarluarput.

Nunani tamalaani unamminerni angusarissaartut ilaat Sermitsiaq.AG-mit allaaserineqarput.

Qaffasinnerpaami unammeqataaneq

Marsip qulingat kalaallit arsaannermi oqaluttuarisaanerani ilannguppoq. Arnat arsaannermi Champions Leaguemi Fortuna Hjørringip FC Barcelonallu unammineranni 17-nik ukiulik Asii Kleist Berthelsen unamminermut isertinneqarpoq unammisut 75 minutsit unammereersut.

Taamaasilluni kalaallini siullersaalluni Champions Leaguemi unammeqataavoq. Fortuna Hjørringip arsaattarfiani, Hjørring Stadionimi unammipput. Unamminermi FC Barcelona 0-5-mik ajugaapput. Ukiumi unammiffiusumi Champions Leaguemi taakku aamma pissartanngorput.

Maligassiuisut Show-imi Asii Kleist Berthelsen Elite Sport Greenlandimit nersornaaserneqarpoq ukioq manna.

Nunat tamalaat unammineranni ’Erfalasorput’

Kalaallit Nunaanni nukittunerpaaq, Kim Ujarak Lorentzen, nunani allani nukittuneqqusaattuni marloriarluni peqataavoq. Arnold Sportsfestival Englandimi oktobarimi ingerlanneqarmat ’log’-imi aamma ’dødløft’-imi unamminerni katinneranni ajugaasuuvoq.

Islandimi Magnus Ver Magnusson Strongman Classic ingerlanneqarmat novembarimi aamma peqataavoq. Tassani unammeriaatsit arfinillit unammissutigineqarput. Tassani ‘dødløft’-imi angusarissaarnerpaavoq aappaattut inissikkami. Arfinileriarluni 325 kilo kivippaa.

Unammeriaatsit katinneranni qulingiluaattut inissippoq.

Kim Ujarak Lorentzen nutaanik siunissamut anguniagasseqqippoq. 1.000 pund, 453 kilo missaaniittoq, aappaagu kivinniarlugu siunnerfeqarpoq.

- Nunarsuatsinni dødløftimik taama oqimaatsigisumik kivitsisinnaasut ikitsuaraapput. Angusaq angisoorujussuussaaq iluatsissinnaassagukku. Upperaara kivissinnaassallugu. Taassuma saniatigut nunani allani nukittuneqqusaalluuni unamminerni Kalaallit Nunaata maluginiarneqartalernissaa aamma angorusuppara, Kim Ujarak Lorentzen oqarpoq.

Pingaarutilimmik inissisimasoq ajoqqusertoq

Kim Ujarak Lorentzenip qatanngutaa, Rina Møller Lorentzen, assammik arsartartuni målmandiuvoq, arnat USA-mi VM-imut anngunniummata pingaarutilimmik inissisimalluni. Taanna anngunniunnermi sølvinnaqataavoq.

- VM-imut anngunniunnitsinni aallartilluarpugut, malunnartumillu holditut ataqatigiinnerput aallartinnitsinniit nuannersorujuusimavoq. Finalemut aqaguttoq Puerto Ricokkut finalemi unammisussaariikkagut unammineranni aallartilluarpugut, målinillu 2-3 siuarsimalluta. Aallartilluarpunga annaasseqattaarlunga, ajoraluartumillu 15 min. Missaani unammineq ingerlareersorlu seeqqunnik nikittoorlunga unammeqataasinnaajunnaarpunga, Rina Møller Lorentzen oqaluttuarpoq.

Kingornatigut misissuinerit takutippaat seeqquani korsbåndiiarsimalluni meniskimigullu ajoqqusersimalluni.

- Finalemi kissasseqataagaluarpunga neriuutigalugu kissakkuma ilaasinnaalerumaarlunga, pullappallaarnerali pissutigalugu nikittooqqeriaannaasutullu misigigama ilaanngitsoorpunga. Aallartinnerluppugut sukkaannaq kinguarluta, uannullu assut annernarlunilu assoroornarsimavoq ilat banemi ilungersortut ikiorsinnaanagit isiginnaaginnarsinnaallugit, oqarpoq.

Finalimi Puerto Ricomut 24-34-mik ajorsarput, taamaasillutik VM-imut anngutinngitsoorlutik.

Suliaritinniarnani aalajangertoq

Ajoqqusereernermi kingorna suliaritissimanani oqarpoq. Savalimmiuni timersoqatigiiffimmi Stjørnanimi isumaqateqarnikuugami eqqarsarluaqqaareerluni suliaritinniarnani aalajangerpoq.

- Elite Sport Greenlandip håndbold forbundillu TAAK-p ingerlaannaq neqeroorfiginikuugaluarpaannga suliaritinnissannik. Eqqarsarluaqqissaaqqaartariaqarnikuuvunga. Ilimaginnginnakku suliaritereeruma qaammatit qulingiluat genoptræningereeruma håndboldimut uteqqinniarnissara, 30-nik ukioqarama Ilisimatusarfimmilu kandidatinngorniaallunga. Ilimaginagulu taassumap kingorna kontraktimut nunami allami neqeroorfigineqaqqissinnaaneq ukioqqortusilaareerama. Taamamamat misilinnikuugiga suliaritinnanga genoptræningerluaruma unamminernut ilaasinnaanngorsinnaanera. Una sæson naammasserusuissuinnarpara, Kalaallit Nunaannut uteruma ilinniarnera aalluteqqikkusukkakku håndboldimut taamak pimoorussitiginissara ilimaginnginnakku, Rina Møller Lorentzen oqarpoq.

Anngunniunnermi angusartik pillugu Anders Friis ima oqarpoq:

- Naak finalimi ajorsarnerput pakatsissutigigaluarlugu USA-mi angusarput tulluusimaarutigaarput. Siullerpaamik finalimut anngunnerput nuannaarutigalugulu tulluusimaarutigeqaarput. VM-mimut anngunnioqqinnissatsinnut piareersaqqilissaagut, Savalimmiuni sapaatit akunnerisa qulingiluaanni sungiusaqatigiissalluta.

Powered by Labrador CMS