arsaanneq
Arsaannermi nunanut allanut sungiusaasoq: Pitsaanerusinnaasut amerlapput
Qasigiannguani angutit arsaallutik pissartanngorniunnerat pitsaanerusimasinnaasoq, nunanut allanut unammisartut sungiusaasuat oqarpoq. Ivigaaqqanik arsaattarfeqalernissaa aamma neriuutigaa
Unamminerpassuit naammaannartut. Timersoqatigiiffiit piareersarluarsimanngitsut kiisalu arsaaffiusoq iluanngilluinnartoq.
Isikkamik arsaannermi angutit nunanut allanut unammisartuisa sungiusaasuata Tekle Ghebrelulip Qasigiannguani GM-ertoqarnera taamatut nalilerpaa.
- Timersoqatigiiffiit arlaqartut unammisaqattaarnissanut piareersimanngitsut malunnarpoq. Arsaaffilunneq pillugu ajoqqusertut arlaqarput, kisianni aamma ajoqqusertarput unammisaqattaarnissamut piareersimannginnerat pissutigalugu, Tekle Ghebrelul Sermitsiaq.AG-mut oqarpoq.
Naliliisoqartariaqartoq
Nuummiut B-67 ukiut sisamat ingerlatiinnarlugit pissartanngorput. Aamma Kalaallit Nunaata oqaluttuarisaanerani amerlanerpaariarlutik pissartanngorput, tassami aqqanilissaa pissartanngoramik.
- B-67 maannamut angusaminik ineriartortitseqqissappat ukiuni tulliuttuni arlalinni pissartanngortarnissaat ilimanarpoq. Maannakkummi inuusuttuaqqanik pitsaasunik arsaattoqarput, sungiusaasunik pitsaasunik ilinniartitsisarput sungiusarnertillu pimooruttorujussuullugu. B-67 unammillerneqarsinnaasariaqarpoq, taamaattumik timersoqatigiiffiit nalilersuisariaqalerput qanoq iliuusissanik nutaanik ujartuisariaqalerlutik, nunanut allanut unammisartuinut sungiusaasoq oqarpoq.
Aamma unammisartut unammeriitsiarnermi kingorna pujortartut takullugit pakatsissutigaa.
- Arsaattartut innuttaasunut maligassiuisussaapput. Sungiusarnerit maannakkumit aallartinneqareertariaqarput, ukioq naallugu tamanna atuuttuusariaqarluni. Unammersuaartoqarnissaanut qaammatit pingasuunnanngortullu sungiusartarnerit unitsinneqartariaqarput, Tekle Ghebrelul oqarpoq.
Ivigaaqqanik arsaattarfiit
Inuusuttuararpassuit unammersuaarnermi peqataanera nuannaarutigaa. Siunissami nunanut allanut unammisartuulernissamut periarfissaqartut arlaliusut oqaatigaa.
Taamaakkaluartoq politikkerinut aamma oqariartuuteqarpoq. Ivigaasanik arsaattarfeqalernissaa kissaatigaa.
- Kalaallit Nunaanni ivikkanik arsaattarfeqartariaqaraluarpoq marlunnik pingasunilluunniit. Sioqqani unammersuaartarnerit qimanneqartariaqarput. Tassami isikkamik arsaanneq ukiuni kingullerni ineriartunngilaq. Pitsassuarnik arsaattartoqarpugut, taakku pitsaasunik atugassaqartitaanissaminnik kissaateqarput, Tekle Ghebrelul oqarpoq.