Arsaannermi GM: Nuummiut unamminissaat allanngorpoq - angalanissaat kinguartinneqarmat
Nuummit B-67 arsaannermi pissartanngorniunnermi Nagdlunguamut ullumi unammisussaagaluarput. Unamminissaalli kinguartinneqarpoq B-67 Nuummit suli aallannginnerat pissutaalluni.
Isikkamik arsaannermi pissartanngorniunnerit silap pissutigisaanik angalaniarnikkut eqqorneqarnera pissutaalluni unamminissanik nikisitsisoqarpoq.
Unammersuaarnermi peqataasussat B-67 Nuummit Ilulissanut sapaatiummat angalanissaraluat taamaatiinnarneqarpoq, taamaattumik Ilulissaneersunut Nagdlunguamut ullumi unammisinnaanngillat.
Timmisartornissaat taamaatittoq
B-67-imi unammisartut tamarmik sapaatiummat nalunaaqutaq 7.00 timmisartumik ilaaffissaraluat taamaatiinnarsimasoq, B-67-ip anføriata Patrick Frederiksenip oqaatigaa.
- Ilulissani pujornera pissutaalluni Kangerlussuarmut timmisartussarput taamaatiinnarneqarpoq. Kangerlussuarmi inissaqartinneqannginnatta timmisartornissarput pingasunngorpamut siullermik inissinneqaraluarpoq, oqaluttuarpoq.
Umiatsiamik angalanissanik misissuinerit
Pissartanngorniunnerni peqataanissartik qilanaaraat, tassami corona pissutaalluni ukiuni marlunni kingullerni silami unammersuaartoqanngilaq.
- Qanoq Ilulissanut apuussinnaanerluta misissulerparput. Angallatinik angalasinnaanerluta misissorparput, Air Greenlandimiilli nalunaarfigineqarpugut marlunngorpat ullaakkut timmisartumik aallarsinnaasugut. Ilulissanut apuunnissarput upperiuaannarparput, naak kingusinaarluta apuuttussaagaluarluta, Patrick Frederiksen oqarpoq, nangillunilu:
- Pilersaarutaasumik Ilulissanut apuutinnginnerput soorunami uggornarpoq, tamattami GM-eqataanissatsinnut qilanaaqaagut. Taamaattoq nukittorsaatigilluassagipput qularutiginngilara, unammeqataarusuppugummi.
Siullermiilinngilaq
B-67 assingusumik siullermik misigisaqalinngilaq.
- Silap allanngorartarnera pissutaalluni angalaniarneq erloqinarsinnaasarpoq. Tamanna soorunami uuminalaarsinnaasarpoq. 2019-mi Sisimiuni pissartanngorniuttoqarmat Kangerlussuarmit Sisimiunut timmisartussarput teknikkikkut ajoqquteqarmat angallammik apuunnikuuvugut. Taamani aamma pissartanngorniunnermi peqataanissarput iluatsippoq, Patrick Frederiksen oqarpoq. B-67 Ilulissani pissartanngorniunnermi ajugaanissartik anguniarlugu oqaatigaa.
B-67 sisamanngorpat unammisussaanngikkaluarpoq, angalaneralli pissutaalluni unamminerit nikisinneqarmata Aasiammiunut T-41-mut sisamanngorpat unammisussanngorput.
Pissartanngorniunnermi unamminissat ima isikkoqarput: