Arsaanneq: VM pillugu atuagassiaq akeqanngitsoq
Tusagassiiviup ukioq manna timersornermi pisut annersaanni arsaattarneq pillugu atugassiaa 50-inik quppernilik atuaruk.
Christian Schultz-Lorentzenimit, tusagassiivimmi Sermitsiaq.AG-mi pisortaaneq
”Qiimmattarnissamut piareerpit?”
Tusagassiiviup Sermitsiaq.AG-p marlunnik oqaasilinnut arsaanneq pillugu atugassiaata saqqaani taamatut allassimasoqarpoq, taanna nittartagarput aqqutigalugu pissarsiarisinnaavat.
Maannalu immikkut qiimmattarnissamut tunngavissaqalerpoq. VM-imi pillugu atuagassiaq akeqassanngimmat.
Akigititaq 29 koruuniinnaangaluartoq aamma arsaattunik isiginnaariarnissamut 20.000 koruuninik makitsisoqarniaraluartoq atuagassiaq naatsorsuutigisimasatut soqutigineqarpallaarsimanngilaq. Nittartakkatigut atuarnissamut akileerusussuseqarneq killeqarsimavoq. Pingaartumik VM pillugu atuagassiaq eqqarsaatigalugu.
Unammiuaartitsinermut kikkut tamarmik peqataasinnaasut
Arsamik ingerlatsiniarnermi taamatut pisoqarsinnaavoq. Suut tamarmik iluatsinneqartanngillat. Tusagassiivimmit digitalikkuinnaq saqqummiunneqartussamik aatsaat akeqartitsiniartoqaraluarpoq. Atuagassiaq netsikkut aviisinik nutaanut atuaruminartunullu peqatigitillugu saqqummiunneqartoq.
Taamaammat "arsaq" sukkasuumik tigussaasumillu ingerlateqqissallugu aalajangersimavugut.
Ussassaaruteqartut eqqarsaatigalugit VM pillugu atuagassiaq kikkunnut tamanut akeqartinneqanngilaq. Peqatigitillugu - saqqummiussisutut - nuannaarutigaarput, ilanngutassiarpassuit atuarneqartariaqartut atuarneqarnissaat qulakkeersimagatsigut. Naggataatigullu oqaatigissavarput, pinnatassamut pilerinarluinnartumut kikkut tamarmik unammeqataasinnaammata.
Atuarluarisi.
VM pillugu atuagassiaq nutaaq UANI pissarsiarisinnaavat.