Arsaanneq: Nunanut allanut unammisartut ullumi unammissapput

Kalaallit Nunaata nunanut allanut unammisartui Irakimiut timersoqatigiiffiannut Al-Kahrabaa-mut ullumi Nunatta nalunaaqutaa malillugu 13.30 unamminerat aallartissaaq.

Nunanut allanut unammisartut Tyrkiami sungiusaqatigiipput. Pingasunngorpat Irakimiunut toqqakkanut unammissapput, angalanerannilu unammineq pingaarneq tallimanngorpat pissaaq, tassani Kosovo unammissallugu.

Nunanut allanut unammisartunut sungiusaasoq Morten Rutkjær unammisartullu Katu Madsen aamma Morten Fleischer unammisaqattaarnerit aallartinnginneranni Sermitsiaq.AG-mit oqaloqatigineqarput.

Unammisartunut periarfissatsialak

- Unamminerit imaannaanavianngillat. Unammisartutta malugissavaat qaffasissumi unammineq qanoq innersoq. Kalaallit Nunaanni arsaatillaqqinnerpaat unammillerneqarnissartik pisariaqartittarpaat, ullunilu tulliuttuni unamminerni unammillerneqarujussuartussaapput, Morten Rutkjær oqarpoq.

Unamminerit tamarmik ajugaarusussuseqarlutik unammisassallutik oqaatigaa.

- Pingaarnerpaavorli ataqatigiittut unamminissarput ineriartornissarpullu. Kalaallit Nunaanni arsaattarneq piviusorsiortumik qanoq inissisimanersoq takussagutsigu ineriartortariaqarpoq. Ajugaarusussuseqarluta unammisassaagut, tamannali pingaarnerpaanngilaq. Superliga-mi arsartartutut pitsaassuseqartunut unammisussaavugut, kiisalu Kosovo, pitsaasunik arsartoqarput. Imaannaanngitsumik misigisaqartussaavugut, taamaattumik qilanaarnarpoq takussallugu unammisanut pitsaasunut qanoq kalaallit qisuariassanersut. Pitsaasut akornanni unammisartuuneq misigissavaat, taamaammat maanga sungiusaqatigiikkiartorpugut, oqaluttuarpoq.

Misigisassarpassuit

Nunanut allanut unammisartut Tyrkiamut arfininngormat tikipput, pingasoriarlutillu sungiusaqatigeereerlutik.

- Sungiusarnermi siullermi angalasimanerat qaangerniarlugu sungiusarput, sungiusarnerni tulliuttuni illersuinissaq saassussinissarlu sungiusarneqarlutik. Tyrkiami kiappoq, arsaattartut aamma tamanna sungiunniaqqaartussaavaat. Tamanna aamma malugitinniarlugu maanngarpugut, qanoq innersoq nunanut allanut unammiartorluni. Imertorluartassapput, kiarujussuarnera malugissavaat timertillu paarissallugu, Morten Rutkjær oqarpoq.

Nunanut allanut unammisartunut sungiusaasuunini tulluusimaarutigaa. Tamarmik ikinngutigiilluatut oqaatigaa.

- Maanna ineriartortitsineq ingerlapparput, tassani sumiiffinni assigiinngitsuni misilittaatillugit. Peqatigalugit nuannareqaara, tullinnguuppoq takussallugu qanoq ineriartortigisinnaanersugut. Misigisaq nuanneqaaq ilagalugit, Morten Rutkjær oqarpoq.

Kiannera unammillernarpoq

Nunanut allanut unammisartoq Katu Madsen oqarpoq, aatsaat taama avatangiisigitsigisumi sungiusaqatigiinermi peqataalluni.

- Nuanneqaaq maaniilluni, tikilluaqqusaalluaqaagut paarineqarluarlutalu. Kiannerujussua unammillernarnerpaavoq. Kissassernataluunniit kiagulereertarpugut. Assut nukissanik atuinarpoq taama kiatsigisumi arsaalluni.

Sungiusarnerminni imertoqattaartitaasarlutik Morten Fleischerip oqaatigaa:

- Sungiusarnitsinni 30-it missaannik kiappoq, arlaleriarluta unikkallarpugut imertortitaasarluta. Maani pingaaruteqarpoq imertorluarnissaq, oqarpoq.

Arsaattarnikkut kulturi allarluinnaq

Irakermiunut unamminissartik qilanaaraat.

- Qilanaarnarpoq unamminissaat. Takunikuunngisaannakkatsinnut unammilerpugut, uagutsinniillu arsaannerup tungaatigut kulturiat allaanerujussuuvoq. Malugaara misiginikuunngisatsinnik misigisaqalerluta. Arsallaqqittunut unammisisussaavugut, taamaammat unamminerup aallartinneranit piareersimasariaqarpugut, Katu Madsen oqarpoq.

Kalaallit Nunaanni GM-ini unamminernit unamminerit sakkortunerussasut Morten Fleischerip naatsorsuutigaa.

- Soorlu arsap tigumminerani naatsorsuutigisariaqarparput ornitsipallattassalluta. Piffissaq annikitsup iluani arsaq tunniunneqartariaqartassaaq. Aamma sukkasuumik eqqarsarnissaq pingaaruteqassaaq, oqarpoq.

Kajumissuseqalersitsisoq

Katu Madsenip aamma unamminissat qilanaarai.

- Naak unamminerit sakkortusussaagaluartut qilanaaqaanga. Maani ajunngeqaagut, nuannisarnissarput sungiusaasutsinnit pingaartinneqartorujussuuvoq. Ikinngutigiilluarpugut, avissaartuuttoqassanani. Ukiorpassuarni arsaattarnikuuvunga, oqarsinnaavungalu tassa arsaattarnera taamaasilluni akilertoq. Arsaannerup tungaatigut isiginikuunngitsannik misigisaqalerpunga, tamannalu pissutigisaanik suli pitsanngoriarusunnermik kajumilersitsivoq, Katu Madsen oqaluttuarpoq.

Nunanut allanut unammisartut peqatigalugit angalaqataasinnaanini Morten Fleischerip tulluusimaarutigaa.

- Kalaallit Nunaanni silami arsaanneq ineriartorteqqinneqaqqilerpoq, taamaattumik tulluusimaarutigaara peqataasinnaagama.

Nunanut allanut unammisartuulertussanut aamma alloriaataasinnaasoq Katu Madsenip oqaatigaa:

- Taamaattumik ineriartortuarnissarput pingaaruteqarpoq, nunanut allanut siunissami unammisartuulertussat ineriartorteqqissinnaassavaat siunissami. Tamanna pingaaruteqartoq isumaqarpunga. Taamaattumik Kalaallit Nunaat Concacaf-imi ilaasortanngornissaa neriuutigaara, tassani unammisaqattaarnissanut allanut periarfissiissagaluarpoq. Neriuppunga ukiuni tulliuttuni taanna iluatsissinnaajumaartoq.

Kalaallit Nunaata sapaatip akunnerani matumani unamminissaat - Nunatta nalunaaqutaa malillugu:

• Ataasinngorneq: Al-Kahrabaa - Kalaallit Nunaat nal. 13.30
• Pingasunngorneq: Irakimiut immikkut toqqakkat - Kalaallit Nunaat nal. 13.30
• Tallimanngorneq: Kosovo (UEFA) - Kalaallit Nunaat nal. 13.30