Arsaanneq: Kalaallit Nunaat oqaluttuarisaanermut ilannguttussamik unammisaapput
Arsaannermi nunanut allanut unammisartut Kosovop U21-mi nunanut allanut unammisartuinut tallimanngorpat unammissapput. Kalaallit aatsaat taama pitsaatigisunut siullerpaamik unammissapput.
Isikkamik arsaannermi Kalaallit Nunaata oqaluttuarisaanerani kapitali nutaaq allanneqartussanngorpoq, nunanummi allanut unammisartut Kosovop U21-mi unammisartuinut tallimanngorpat unammisussanngorput.
Kosovop unammisartui peqataasussat Europami nunani assigiinngitsuni unammisartuupput, Kalaallit Nunaallu aatsaat taama qaffasitsigisumik unammisartunut unammisussanngorlutik.
Isertitat ilaat pinngitsoortinneqarsinnaagaluartut
Kosovop U21-nut unamminnginnerminni kalaallit marloriarlutik unammipput, kingulleq pingasunngormat Irakimiunut immikkut toqqakkanut unamminerminni 0-6-mik ajorsarlutik.
- Unamminermit siullermit arsarluarnerupput. Kiannera arsaaffillu sungiunneroriaramikku arsarluarnerupput, kiisalu unamminermit siullermit tunioraannerullutik, nunanut allanut unammisartunut sungiusaasumut ikiorti Nukannguaq Zeeb Sermitsiaq.AG-mut oqarpoq.
Unammisartut misilittagakinnerat pissutaalluni arlaleriarlutik isertitsiffigineqarsimallutik oqaatigaa.
- Unammisartut suli misilittagaqarnerulaarsimasuugunik isertussaagaluit pinngitsoorsinnaasimassagaluarpaat. Sapiinnerullutik unammipput, unamminerullu tulliani piareersimaqqissaartussaapput unammineq naallugu. Kiisalu aalajangigassat eqqortut sapinngisartik tamaat aalajangerniartartussaavaat. Nunanut allanut unammisartut qaffasissumik unamminissaannut periarfissinneqarsimanerat nuannaarutigeqaarput, tamannami sungiusaasunngorattali sulissutiginikuuarput, Nukannguaq Zeeb oqaluttuarpoq.
Misilittagaqarnerulernissaq siunnerfiuvoq
Arsallaqqittunut unamminissaat pingaaruteqartoq oqaatigaa:
- Concacaf-imut ilaasortanngussagutta unamminernik imaattunik pisariaqartitsivugut, siornatigummi Danmarkimi Serie 1-mi Danmarksseriamilu unammisartunut taamaallaat unammisarnikuuvugut. Qaffasissumi unammineq unammisartutta malugisariaqarpaat, tamannalu maani malugivaat.
Kosovop U21-nut unammilerunik unammisartut qanoq qisuariassanersut takussallugu qilanaaraa.
- Oqaluttuarisaanermi aatsaat taama pitsaatigisunut unammilerpugut. Aamma unammisartutsinnut unammineq sakkortussaaq. Nunanut allanut unammisartuugallarama taamatut periarfissinneqarsimannginnerput uggornarpoq. Maannakkut inuusuttorpassuarnik arsaattoqarpugut, taamaattumik nuannaarutigaara taama qaffasitsigisumik unammisartunut unammilermata, tamannami siunissami atorluarsinnaassavaat, oqarpoq.
Unammeqataasinnaasoq
Nunanut allanut unammisartut ajorsaqattaarnerat malinnaasunit pakatsissutigineqarsinnaasarnera oqaatigaa.
- Eqqaamasariaqarparpulli aatsaat taama qaffasitsigisunut unammigatta. Maannakkut siunissaq eqqarsaatigalugu ineriartortitsivugut – taamaasilluni aamma unammisartut misilittagaqarnerulissapput, oqarpoq, nangillunilu:
- Kosovop U21-anut unamminermi imaassinnaasoq isilaartunga. Pisariaqalissappat isilaarumaarpunga neriuutigaaralu isilaarumaarlunga, piareersimajuarpungami unammiffiup avataani iluaniluunniit ikiuutissallunga.
Inatsisit assigiinngitsut peqqutaallutik unammineq TV-ikkut aallakaatinneqassanngilaq.
Kosovop U21-ni sungiusaasuata, Afrim Tovërlani-p, unammisartut uku toqqarpai: