Arsaanneq: Ajorsaraluarlutik takutitsilluartut

Arsaalluni nunanut allanut unammisartut Tyrkiami Antalyamiipput, tassani sapaatip akunnerata iluani pingasoriarlutik unammisussaapput.

Unammineq siulleq ippassaq ataasinngornermi ingerlanneqarpoq, tassani Irakimiut timersoqatigiiffiannut Al-Kahrabaa-mut unammillutik.

Immikkoortumi siullermi tallimanik kinguaqqasut

Kalaallit nunanut allanut unammisartui unamminermi aallartinnerlupput, unamminerup aallartinnerani pingasoriarlutik isersititsiffigineqarlutik.

- Unammineq aallartimmat tunuarsimaakannerpugut. Unammineq siulliuvoq, taavalu unammisagut piffissamik annertuallaamik tunisaqattaarlugit. Unamminerit siulliit tassa taamaariasaarsinnaasarput, nunanut allanut unammisartoq Katu Madsen Sermitsiaq.AG-mut oqarpoq.

Immikkoortumi siullermi marloriarlutik isertitsiffigineqaqqipput, taamaalilluni immikkoortumi siullermi 0-5-imik kinguaqqallutik.

Isertitsineq nukissanik tunisisoq

Unamminerup immikkoortuisa aappaanni nunanut allanut unammisartunut sungiusaasoq allannguivoq, tamannalu malugineqarluarsinnaasimasoq Katu Madsenip oqaatigaa.

- Inissisimanerput allanngortipparput, 4-1-4-1 atulerlugu, taanna iluatsittorujussuuvoq. Unammisatta arsamik paarsisui piffissamik annikinnerusumik arsaq paarinissaat pingaartipparput, taamaasilluni utimut arsarnerutilerlugit. Taamaasilluni uagut aamma unammiffitsinni qullaallalluta unammilerluta. Immikkoortumit siullermit unammilluarneruvugut, arsarlu paarinerulerlugu, oqarpoq.

Kalaallit strafferlutik isertitsinissamut periarfissinneqarput unamminerup immikkoortuisa aappaata aallartinnerani. Nemo Thomsen strafferluni isertitsisuuvoq.

- Isertitsinerput nuanneqaaq, nukissamillu tunisisorujussuulluni. Unamminerup immikkoortuani siullermi seqinningaatsiarpoq, kiarujussuarluni, taamaattumillu nukissanik atuisorujussuulluta. Unammineq aallarteqqimmat isertut nukissanik nutaanik tunisipput, unammiffimmi qaffasinnerusumik unammilerpugut, straffinnallutalu. Nuanneqaaq taama pikkoritsigisunut isertitsilluni, Katu Madsen oqaluttuarpoq.

Pingasunngorpat unammeqqissapput

Al-Kahrabaa ataasiarlutik isertitseqqipput, taamaasilluni unammineq 1-6-mik inerneqarluni. Unamminerup immikkoortuisa tulliat naligiiffiuvoq tamarmik ataaseraarlutik.

- Unammeqqilerutta unamminerup immikkoortuani tulliani unamminitsitut aallartittariaqarparput. Immikkoortup aappaani unammilluarneroqaagut, taanna unamminerup tullianut ingerlateqqissinnaavarput. Suli nuannisaqaagut, nikallunngilagut, aamma unammeqqinnissatsinnut suliassagut suliariniarpagut, Katu Madsen oqarpoq.

Pingasunngorpat Irakimiunut toqqakkanut unammeqqissapput, tallimanngorpallu unamminermi pingaarnermi Kosovo unammissallugu.