Island Games
Arsaanneq: Arnat ingerlaqqinngillat
Arnat arsaalluni nunanut allanut unammisartut Hitra-mut ajorsarnermik kingorna medalje-nassinnaajunnaarput
Arnat kalaallit arsaalluni nunanut allanut unammisartut Island Gamesimi, Jerseymi ingerlanneqartumi, gruppiminni kingullersanngorput.
Arnat Hitra-mut ajugaaniartussaapput, unamminermi siullermi angerlarsimaffimminniittunut Jerseymut ajorsarnikuugamik. Kalaallit Nunaalli tennis-ertartut kisitsisaannik 6-1-imik ajorsarpoq.
– Pakatseqaagut. Unamminerup immikkoortuani siullermi naligeeqaagut, iluatsitsiniartussaavugullu semifinalimut ingerlaqqinniassagutta. Unamminerup immikkoortuata aappaani arsariaaserput allanngortipparput, pingasunik saassussisartoqalerluta. Arsaq tigummisorujussuugaluarparput, unamminerulli immikkoortuata aappaani Hitra saassusseriataarluni måleqattaarpoq, Bent Petersen unamminerup kingorna Sermitsiaq.AG-mut oqaluttuarpoq.
Unamminerup immikkoortuata aappaani kalaallit 1-2-mik kinguaqqallutik hjørnernerup kingorna isertitsigaluarput.
– Tassani dommeri ersarissorujussuarmik kukkuvoq. Dommeri kukkusimanngitsuugaluarpat unammineq allaanerujussuussagaluarpoq. Tassami unamminerup immikkoortuata aappaani arsaq tigumminerujussuugaluarparput, nunanut allanut unammisartut sungiusaasuat pakatsisimasoq oqarpoq.
Ajorsarnermik kingorna arnat kalaallit nunanut allanut unammisartut Island Gamesimi medalje-nassinnaajunnaarput.