Island Games

Arpattartut tallimat Island Games-imi peqataalertut

Nunatsinniik arpattartut arnat marluk angutillu pingasut Island Games-ertoqarnerani peqataassussatut toqqarneqartut

Jeg er sikker på, at Martin Møller vil gøre det godt under Island Games, siger Niels Tuutu Berthelsen, der er ansvarlig for løberne ved legene

Island Games una qaammat svenskit qeqertaaraanni Gotlandimi ingerlanneqartussaq aallartissaaq.

Arpalluni unammisaqattaarnissami kalaallit peqataatitaqassapput, arpattartullu tallimat peqataasussat toqqarneqarsimapput.

Arnani peqataassapput Ukaleq Slettemark kiisalu Kista Hammeken Lennert, angutinilu Martin Møller, Michael Clasen aammalu Niels Tuutu Berthelsenilu peqataassapput.

Kingullertut taaneqartoq Gotlandimi arpannernik unammisaqattaarnissanut akisussaasuussaaq.

- Anguniangarput angoreersimavarput. Unammiuaarnernummi peqataanissarput ilungersuutigisimavarput, maannalu peqataatitaqarsinnaalernerput nuannaarutigaarput, Niels Tuutu Berthelsen oqarpoq.

Arpaffissaq unammillernarsinnaasoq

Unammilernartunut ilaavortaaq 5 kilometerimut 10 kilometerimullu isorartutigisumut arpanneq arpattarfimmi ingerlanneqartussaanera.

- Nunatsinni taamaattoqanngilagut, arpaffissaq allaaneruvoq taamaammat uagutsinnut unammillernarsinnaassaaq. Kisianni Island Gamesimi Martin Møllerip takutitsilluarnissaa qularinngilara, taanna erseqqissaavoq.

Unammiuaarnerit ingerlanneqarnerisa nalaani ujakkaartartoq Martin Mølleri angusarissaarnissamik periarfissangissaarnerusoq, taassuma oqaatigaa.

- Kalaallit Nunaannit Timersortartut Kattuffia suleqatigalugu peqataasussat nassaarisimavagut. Løbebåndit atorlugit misileraanerit ingerlassimavagut, misileraanermilu angusisut toqqarsimallutigit, taanna erseqqissaavoq.

2019-mut piareersaatit

Siumut isingaluta 2019-mut piareersaatit aallartereersimavagut, taanna paasissutissiivoq.

- Tulliani Island Games-ertoqarnissaanut immikkut piginnaanillit ujartussavagut, tassani ataavartumik sungiusarnerit ingerlanneqartassallutik. Qularinngilluinnarpara pitsaasunik arpattartorpassuaqartoq, ersarinnerulernissaallu sulissutigissavarput, Niels Tuutu Berthelsen oqarpoq.

Arpattartunik toqqaaniarneq ajornakusoorsimavoq, arpattartummi kattuffeqannginnerat unammillernarsimavoq.

- Kattuffeqassappat, Nunatsinni peqatigiiffiit minnerpaamik arfiniliusussaapput. Taamaammat Nuup Sisimiullu avataani najugallit attaveqarfiginiarnerat ajornakusoorsinnaavoq. Taamaammat neriuutigaarput, arpattartut amerlanerulernissaat, Niels Tuutu Berthelsen oqarpoq.

Powered by Labrador CMS