eqqartuussut
Arpattartup pinngitsaalisua illoqarfiup eqqartuussiavini pisuutinneqartoq
Angut kalaaleq 30-nik ukiulik arnamik 39-nik ukiulimmik Østerbromi Københavnimiittumi pinngitsaaliisimasutut toqutseriaraluarsimasutullu pisuutinneqaqqammerpoq. Ekstra Bladet taama allaaserinnipoq.
Nal. 9.27 nutartigaq
Angut kalaaleq 30-nik ukiulik arnamik 39-nik ukiulimmik toqutseriaraluarsimasutut pinngitsaaliisimasutullu Købenavnip illoqarfimmi eqqartuussiveqarfiani pisuutinneqarpoq. Ekstra Bladet taama allaaserinnipoq.
Angut 30-nik ukiulik arnamik siorna aggustip qaammataani ullaassakkut arpannerata nalaani saassussisimasutut unnerluutigineqarpoq.
Arnaq pineqartoq orpikkat akornanni tamataqarani inuunerminillu navianartorsiortoq toraarneqarpoq.
Københavnip illoqarfiata ilaani Østerbromi Sporsløjfenip eqqaani saassunneqarnermi pinngitsaalineqarnermilu kingorna nalunaaquttap akunnerini qulingiluani tassani nalasimavoq.
Unnerluussineq aallaavigalugu, angutip arnamut pinngitsaaliinermini toqutseriaraluarsimavoq. Arnaq tilluarlugu, isimmittarlugu allunaasamillu qiminniarsaralugu toqunniarsimagaluarpaa. Tamatuma kingorna arnaq aanaartoq ilisimajunnaaqqasorlu qimaannarsimallugu.
Dna atorlugu uppernarsaatit nakkutilliissutillu immiussat atorlugit paasineqarpoq pinerluttoq tassaasoq angut kalaaleq 30-nik ukiulik.
Angutip unnerluutigineqartunut pisuunnginnerarpoq, eqqaamasaqarsimannginninilu nassuiaatigalugu.
Unnerluussisussaatitaasut naapertorlugit, angut pineqartoq ima ulorianaateqartigaaq immikkut paarisassanngorlugu pineqaatissinneqartariaqartoq. Tamannalu isumaqarpoq piffissami killiligaanngitsumik parnaarussassanngortinneqassasoq.
Inaarutaasumik pineqaatissiinissaq aqagu pissasoq naatsorsuutigineqarpoq.