Arctic Circle Race

Arpattartoq tappiitsoq Sisimiuni 160 kilometerinut piareertoq

Arne Christensenimut aappassaaneerneq iluatsitsiffiunissaa neriuutaavoq, taanna tappiitsuuvoq Sisimiunilu ullut pingasut qaangiuppata Arctic Circle Racemi arpaqataassaaq

Arne Christensen Kastrup Lufthavnimi

Marlunngornermi ullaakkut Københavnip mittarfianit aallarpoq, assami illuanik tappiitsunut ajaappiaq tigullugu, illuanillu assiliissut tigullugu Arne Christensen Danmarkimut inuulluaqqusivoq.

Taanna angut utoqqasaaq tallimanngorpat aallarfissami peqataasut 200 allat arpattartut peqatigalugit nunarsuarmi ujakkaarfiit sakkortunersaasa ilaanni, Arctic Circle Racemi nikorfassaaq.

Timersortartoq nukittooq
Arne Christensen Københavnip avannaani Virumimeersoq, Sisimiuni arpannermi tusaamaneqartumi, ukioq manna 20-issaanik ingerlanneqartussami tappiitsuni peqataasut siullersarissavaat.

Katillugu 160 kilometerinik isorartussuseqarpoq, taanna arpattut ulluni pingasuni naammassissavaat.

Kisianni Arne Christensen imminut unammillerluni aatsaat siullermiilinngilaq. Marathonip affaanut arlaleriarluni aamma ironmanimut ataatsimut peqataanikuuvoq.

Arpannerit arlallit
Arpattartup tappiitsup ujakkaarutinik arpanneq misilittagaqarfiginnginneranut isiginnaartut aamma ernummatigissanngilaat.

Arne Christensen innarluutilinnut OL-imi tallimariarluni peqataanikuuvoq, qallunaanilu tappiitsuni siullersaalluni Sverigemi Vasami arpanneq aamma Norgemi Birkebeinerrennetimi peqataanikuuvoq.

Ilaaqqusaasimanngitsoq
Timersortartoq tappiitsoq siorna peqataaqqusaasimanngilaq, Sisimiuni arpannermi aqutsisut ingerlanermut qulakkeerinnissinnaanngimmata, Arne Christensen Det Grønne Områdemut oqaluttuarpoq.

- Arctic Circle Race ukiuni amerlasuuni eqqarsaatinniittuarsimavoq, siornalu ilaaniarlunga misiliivunga, sillimaniarnerlu pissutigalugu aaqqissuisunit itigartinneqarpunga. Ukioq manna misileeqqippunga, marlunnik ingiaqateqarlunga ingerlanissannut piumasaqaatitalerlugulu akuerisaavunga.

Tamatuma inerneraa Team Blind, tassani Arne Christensen sisamanik ingiaqateqarpoq - marluk aqqutaani aamma marluk ikiuuttussat.

Det Grønne Områdemi atuaruk: 160 km på ski i blinde

- Tappiitsuulluni iluaqutissatuaavoq, nillertorujussuuppat imaluunniit perserpat qungasequtiga niaqqunnut qummoorsinnaagakku. Takusaqarsinnaanngereerpungami, qallunaaq qungujulluni aviisimut oqarpoq.

Sermitsiaq.AG aamma ACR 2016-imut peqataassaaq - Arpannermit allaaserisassanut qilanaarsinnaavutit

Powered by Labrador CMS