rekorti

Arpannermi rekortiliineq: - Assorsuaq nuannerpoq

Pipaluk Kristensen Ilulissani Cecilialøbet-imi 22,5 kilometerinut isorartutigisoq arnani siullersaalluni akunnerit marluk ataallugit arpaffigaa

Taanna Oqaatsuniit Ilulissanut arpannini tamaat anguniangaqarsimavoq. Tassa Pipaluk Kristensenip nunami 22,5 kilometerimut isorartutigisumut arpannermini nalunaaquttap akunneri marluk ataateriarusussimavai.

Aatsaalli apuutilivinnermini tamanna upperillualersimavaa.

- Aatsaat minutsini kingullerni, taanna Sermitsiamut oqarpoq.

Taamaatsianngitsorlu tamanna piviusunngorpoq: Cecilialøbet-imi Pipaluk Kristensen piffissaq 1.59.16 atorlugit rekortiliilluni apuuppoq.

Piareersarluarneq

Taanna arnaq inuusuttoq Aasianniitilluni upernaakkut nalunaqquttap akunneri marluk angujartuaarsimavai. Taanna ukiuni kingullerni arfineq marlunni Cecilialøbet-imi peqataasarsimavoq. Angusarinnerpaangamilu 2.06. atorsimavai.

- Maajip qaammataani ukioq manna qasujaannerullunga malugisimavara, tassanili ilungersulerlunga.

Pipaluk Kristenseni sukataarluni qasujaallisarsimavoq. Anguniangaqarluni sungiusarnerpassuit ingerlassimavai.

- Ukioq manna qasujaallisarnerit kiiarnerit sammineruvakka aammalu nissukka nukkassarsimallugit.

- Eqqarsartaatsikkut aamma sungiusarsimavunga.

Kilometerit kingulliit ilungersunartoq

Taaneqartorli kingulleq kilometerini kingulleni pisariaqarsimasoq paasinarsisimavoq.

Aallaqqaammulli Pipaluk Kristenseni aalajangersimasumik sukkassuseqarsimavoq, killiffinnilu imerfinni piffissaq tamatigorluinnaq takusarsimallugu.

Pilersaarutilli malillugit kilometerini kingullerni taanna sukkatsittussaasimavoq.

- Ilungersunaqaaq. Anoraasuarpoq, nissukkalu qasoqalutik, taanna oqaluttuarpoq.

Tamakkuli tamaasa soqutiginaveersaarlugit sukkatsissimavoq, ikaartarfimmiillu illoqarfiup tungaanut qummukajaaq kingulleq ilungersorfingingaatsiareerlugu taanna rekortiliilluni apuuppoq.

- Taama angusarissaartingaluni oqaluttuariuminaappoq. Qiiaammerujussuarpunga. Sinnattoriuarsimavara nalunaaquttap akunneri marluk ataatsissallugit, massakkulli iluatsippoq. Assorsuaq nuannerpoq.

Naak nuannaangaatsiarnermit ullualunnguit qaangiutiinnaraluartut sungiusarnermi anguniangassat inissinneqareersimapput.

- Iluarsaallunga massakku annikitsumik sungiusassaanga, siffiakkalu nukittorsarlugit. Singernikka nukittorsassuakka arpariaaseralu pitsanngorsaqqillugu.

- Qaquguungaluarnersorli Paris-imi marathon-imut peqataassaanga, arnaq inuusuttoq tulluusimaaqisoq oqarpoq.

Cecilialøbet-imi 22,5 kilometerimut isorartutigisumut angutini Frederik Petersen piffissaq 1.39.48 atorlugu ajugaavoq.

Powered by Labrador CMS