kommuninut qinersineq 2017
Arnat siuariangaatsiartut
Angutit kommunini inissat arlallit annaasussanngorpaat. Qinersisartut arnat pissaaneqartikkusunneruaat. Kalaallit Nunaat nunani tamalaani naligiisitaanikkut rekortiliisinnaagunarpoq.
Kalaallit Nunaanni ippassaq unnuk arnat pigaat.
Arnat siuariarluarput. Qinikkat kommunini agguataarneqarnerat qinersinermi nittartakkamit, valg.gl-imit, suli saqqummiunneqanngilaq, kisianni arnat qinigassanngortittut ataatsimut isigalugu qiimmattarnissaamut pissutissaqartut qularnanngilaq.
Ingammik Asii Chemnitz Narup ullaaq iterluarsimassaaq. Qinersinermi kingullermi 2013-imi innuttaasut 1.337-it taavaat. Maanna aatsaat taama taagorneqartigaluni 2.259-nit taaneqarpoq.
Illoqarfiit pingaarnersaata kommuniani illuatungiliuttut aamma arnamik siuttoqassapput, tassa Naalakkersuisunut ilaasortaasimasoq, Martha Lund Olsen (S). Innuttaasut 482-t taavaat. Nuna tamakkerlugu isigissagaanni Martha Lund Olsen Siumumit politikerini taaguunneqarnerpaat tulliuvoq, Qeqqata Kommuniani Malik Berthelsenimit kisimi qaangerneqarluni.
Siumup Kommuneqarfik Sermersuumi siuttorisimasaa, borgmesterip tullersortikua, Martha Abelsen, 2013-imi malunnaatilimmik angusarissaarneruvoq. Taamani 770-nit taaneqarpoq. Martha Abelsenili maanna qinigassanngortinngilaq.
Ane aamma Kiista
Kujataani innuttaasut aamma ullormi nutaami iteramik, qinersinerup inernerata arnaq siuttutut inissitsissamaarpasippaa. Siumumeersoq Kiista P. Isaksen 456-nit taaneqarpoq, parteeqatiminit Jørgen Wæver Johansenimit aamma Simon Simonsenip katinnerinit marloriaatingajannik angusaqarluni.
Qinigassanngortittoq amerlanerpaanit taaguunneqartoq borgmesterissatut sassartinneqartartoq, Siumumi inatsisaavoq.
IA-p Kujataani pingaarnertut sassartitaa, Stine Egede, aamma qinersinermi angusarissaarpoq. Taanna 313-nit taaneqarpoq, Wæver Johansenimit aamma Simon Simonsenimit amerlanerungaatsiarput. 2013-mut sanilliullugu taasinernik 100-ngajannik siuariaateqarpoq.
Rekorti?
Kommunini politikkikkut inissiffissat oqimaatsut agguataarneqarnissaat suli ammavoq. Isumaqatiginninniarnerit pissanganartut akunnerni immaqalu ulluni tulliuttuni utaqqineqarput, minnerunngitsumi Qaasuitsoq Kujallermi Inatsisartut siulittaasuata tullia, Ane Hansen, IA-mi 350-nit taaneqarluni taaguunneqarnerpaavoq. Taamaalilluni borgmesterinngorsinnaavoq.
Kommunini pingasuni arnat borgmesterinngussappata (tallimaasunit) Kalaallit Nunaat naligiissitaanikkut nunarsuarmi rekortiliisinnaavoq. Paasisimasat naapertorlugit nunarsuarmi arnat borgmesterit angutinit aatsaat amerlanerussapput. Danmarkimi borgmesterit qulingiluararterutaat arnaasarput. Sverigemi naligiissitaaffiunerpaatut isigineqartartumi 37 procentiupput.
Tamanna assigalugu arnat amerlanerusut ataatsimiititaliani siulittaasuuffiit pingaarutillit tigussamaarpasippaat. Kommuneqarfik Sermersuumi arnat Demokraatineersut taaguunneqarluartut assersuutitut taaneqarsinnaapput.
Nivi Olsen kommunini qinigassanngorteqqaarnermini 467-nit taaneqarami taaguunneqarluaqqippoq. Demokraatit siulittaasuat Randi Vestergaard Evaldsen 389-nit taaguunnqarpoq. Lena Ravn Davidsen 206-nit taaguunneqarpoq. Partiimilu tassani aatsaat sisamaattut angut inissippoq, tassa Justus Hansen.
IA-kkunni aamma angummik taaguulluarneqarnerpaamik sisamaattut inissisimasumik aatsaat nassaassaqarpoq, Peter Olsen.