Skip to main content

Arnat qulit Mikael Petersen kinguaassiuutitigut innimiilliorsimasutut unnerluutigigaat

Arnat qulit Mikael Petersen kinguaassiuutitigut innimiilliorsimasutut allakkatigut unnerluutigisimavaat, allakkat taakku tunngaviupput, Mikael Petersenip sapaatip akunnerani kingullermi marlunngormat Siumumi allatsitut suliunnaarsinneqarneranut.

Arnanut arlalinnut utikattumik kinguaassiuutitigut innimiilliortarsimasimanermik unnerluussinerit tunngaviupput, Siumumi siulersuisut sapaatip akunnerani kingullermi partiimi allatsip pissaanillip Mikael Petersenip suliunnaarsinneqarnissaanik aalajangernerannut.

Arnat qulit taakku tamarmik immikkut oqaatsitigut timikkullu innimiilliorfigineqartarsimanermik qanoq misigisarsimanertik allaganngorlugu nassuiarsimavaat, allakkallu taakku ataatsimoortillugit siulersuisunut nassiunneqarsimapput, iliuuseqartoqarnissaanik kaammattuummik ilallugit.

Marlunngormallu kingullermik siulersuisut suliunnaarsitsillutik qisuariarput.

Sermitsiaq.AG-mit allakkat qulit taakku pissarsiarineqarsimapput, allagarineqartullu ilumuussappata isertuarani kinguaassiuutitigut innimiilliortoqarsimarpasippoq, aamma taamatut pissusilersortarnerup ilisimaneqarlunilu akuersaarneqartarnera ileqquliutiinnarneqarsimarpasippoq.

Attuualaarinnittarnerit atoqatigiinnissamullu kaammattuuteqartarnerit

Assersuutigalugu arnat ilaat allappoq: 

- Tassanngaannaq Miiaq apereriataarpoq: ”Elskerinderilakkit, sumulluunniit aallarusukkaangavit oqaannartassaatit marluulluta feeriartarumaarpugut.” Eqqaamavara angutit taakku pingasut illaannartut, arnat taakku ilaat allappoq nangillunilu:

- Aamma taamaallunga sofami issiasunga saninnut ingeriarluni nissunnut assani inisseriarlugu ”unannguaq mamarunaraangami”-eertuutigaluni assani arriitsumik uppatinnut ingerlatippaa.

Peqatigitillugu arnap taassuma allagaqarsimasullu ilaasa oqaatigaat, taamatut pisoqarnerani kingusinnerusukkullu soriarsinnaanngitsutut misigisimasarlutik.

- Uangaarannguaq oqaraluaruma susoqarnavianngilaq taama Mikael P pissaaneqartigalunilu ataqqineqartingisoq, taanna allappoq.

- Siumup iluani suleqataasalerninni oqaatsit paquminartut nuanninngitsullu oqaatigineqartalerput soorlu; ”kujallutit nuannerunaq”, ”iviangitit mamarunat”, ”usuga attorukku oorimik tunissavakkit”, attuualaartinnerit iviangikkut nulukkullu. Oqarfigisarpara taamaaliorunnaaqqullugu soqutigineq ajorpaa, arnaq alla allapoq.

Annilaanganeq

Arnat taakku qulit ilaatigut partiip allaffiani sulisuusimapput, namminneq piumassutsiminnik ikiuuttarsimapput, Siumut inuusuttaanni ilaasortaasimapput politikkeriusimallutillu.

Nassuiaatini arlalinni takuneqarsinnaavoq taamaaliornini unitsissagaa oqarfigissallugu ajornakusoortittarsimagaat.

- Akerusukkaluarlugu akinngitsuuginnartarpara, taamalu pisoq angerlaattarlugu nuanniilliortupilussuullunga, kamallunga il.il., arnaq alla oqaatsitigut timikkullu innarlerneqarsimasoq nassuiaavoq. 

Siulersuisunut allakkat kingunerisinnaasaanik ernummateqarneq allakkani arlalinni takuneqarsinnaavoq.

- Atera isertuuppara kisianni misigisara oqaluttuarissavara, arnaq allappoq nangillunilu:

- Qineqqusaarnerup nalaani taamaalluni allaffimmiittugut nulukkut tigunikuugaminga allamik isigisoqartoq assut nuanniigigakku allaffimmut isissaarpunga, nuanniigigakku misigisarama killissakka taakani qaangerneqartartut. Taamaalillunga SISimiik tunuaannarpunga naak siumumiik tunuanngikkaluarlunga.

- Peqqarniittumik qisuariartarpoq

Arnaq taanna arnat allat arfinillit assigalugit siulersuisunut kinaassutsiminik isertuussivoq. Arnat pingasut allakkatik atsiorsimavaat. Allakkat tamarmik assaannarmik allataapput, uanngalu allaaserinnittuusup arnat qulit taakku kinaassusaat nalunngilai.

- Taamaaliortarnera pillugu oqaloqatigineqarsinnaanngilaq. Peqqarniittumik qisuariartarpoq, killissaralu tikikkaangakku qimaarusuttaraluarpunga, arnaq Siumut arnartaannut inuusuttunut allanut kinguaassiutitigut innimiillorneranik nikassaaneranillu takunnissimasoq oqaluttuarpoq.

- Naleqartitakka oqaasinngorniaraangakkit (kinguaassiuutitigut innimiilliornera pillugu) illarnartutut piaarisutulluunniit nipeqartinniarsarisarpaa. Tassaartarnikuuara kisianni sivitsunngitsoq taamatut ilioqqittarpoq, paasiinnarpara ataqqinngikkaanga.

Allat isiginnittartut

Allakkani tamani takuneqarsinnaasutut, arnat oqaluttuarivaat innimiilliornerit arlallit angutit allat isigineranni pisartut, ilaatigut isiginnittut taakku arnanut inniminniillioqqullugit kaammattorneqartarlutik.

-  Illartuusaaginnartarpugut, taamaaliunngikkuttami malersorniarluta pissaaneq sallulu atortussaammagit, ataaseq oqarpoq.

- Mikael Petersenip kujammut, arnanullu isiginnittariaasaa tujorminaqisoq. Allaammi naartugaluartunga aporfiginagu oqaasertalersuisinnaasarpoq, alla nassuiaavoq.

Mikael Petersenip arnarpassuit sequtserpai.

- Kingorna eqqarsaatigileraangakku amiilaartarpunga, nalunagu arnarpassuit taamak pisarai, akuersaaginnarneqarlunilu suli sulitinneqartoq, arnaq taamatut pissusilersornermik unitsitseqqusilluni siulersuisunut toqqaannartumik kaammattuuteqartoq oqarpoq.

- Isiginngitsuusaarunnaarlusi iliuuseqarniaritsi, Mikael Petersenip arnarpassuit sequtserpai.

Allap oqaatigaa, taamatut pissusilersorneq unitsinneqanngippat assigiinnaraa akuersaarneqartoq isumaqarluni.

- Tupigusuttarpunga tamakkua tusagassiutinut anngunneqarneq ajormata, isumaqarpungali massakkut iliuuseqartoqanngippat piffissaq apeqqutaaginnalersoq, taanna oqarpoq.

Mikael Petersen kinguaassiutitigut pissusilersuutigisartakkani pillugit oqaluttuarineqartut assigiinngitsut pillugit ilisimatinneqarsimavoq. Qisuariaataa uani atuarneqarsinnaavoq:

LÆS OGSÅ: Mikael Petersen: Unnerluussinerit sakkortuut ilisarisinnaanngisakka

Politikkerit kinguaassiuutitigut innimiilliortarnerannik innarliisarnerannillu paasissutissaateqaruit, oqaluttuarerusukkukkillu, taava Walter Turnowsky walter@sermitsiaq.gl imaluunniit +299 562248 aqqutigalugit saaffigisinnaavat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER