isikkamik arsaanneq
Arnat nunanut allanut unammisartut Tysklandimut unamminerminni tupaallatsitserujussuarput
Danskit arnat isikkamik arsaannermik nunanut allanut unammisartui tupaallaatsitsillutik sapaammi europami pissartat Tysklandi 2-1-mik ajugaaffigaat.
Danskit aallartinnerlioreersut, Theresa Nielsen aamma Nadia Nadimip tamarmik ataaseraarlutik Danmarki semifinalimut anngutsippaat.
Tysklandi 1995-miilli EM-imi pissartaapput. Ukiulli qulikkuutaat marluk ingerlanerini tyskit unammersuarnermit ajorsartinneq ajuleqqasimavaat. Tamannalu sapaammi Rotterdamimi kvartfinalertoqarnerani allanngortinneqarpoq.
Unammineq 2 minutsinik ingerlasimariitsiartoq tyskit ungasianiit uloriananngitsumik isertitseriarnerat målmandip Stina Lykkep kukkuluttornermigut annaatinngitsoorpaa. Lykkep arsaq tillullugu peeriaraluarpaa, eqqornerlunneratali kingorna arsaq iserluni.
Danskit ilimagineqanngitsut
Unammineq ilungersunareertussaq Isabel Kerschowskip isertitsinermigut, danskit ilimagineqanngitsut ilungersuummerterujussuarpai.
Kisiannili unamminerup immikkoortua aallartisimasitsiaannartoq Danmark isertitsivoq, tassani Nadia Nadim arsaq niaqummullugu isertitsinermini unammisut 1-1-mik naligiisilerpai neriuteqalersitsillunili.
Stine Larseni arsaaffiup talerpiatungaani sukataarluavippoq, arsamik paarinnilluaqattaarluni. Linjedommeriusoq tyskit frisparkernissaannik nappaammat, Dzsenifer Marozsan aamma Isabel Kerschowski unipput.
Dommeriusorli Katalin Kulcsar sigganngilaq, taamaasilluni Stine Larsen arsaq arsaattarfiup killingata tungaanut ingerlappaa arsarlu Nadimimut niaqqumuungassanngorlugu qeqqanoorlugu.
Tyskit unammisartui tupaqqasut illersuiniapiloorput, danskillu tyskit peernissaanut periarfissarpassuaqarlutik.
Danskit saassussisaqattaartut
Danskit sukkasuumik saassussisarneri tamatigorluinnaq uloriarnartorsiortitsisarsimapput, taakkuli arlaqarput.
Katrine Veje periarfissinneqarujussuarsimavoq. Nadim qeqqanoorinermigut taanna saamiatungaani unammisartoq oqilasooq tunilluarsimavaa, taamaattoq arsaq målerfiup ikaarutaa toqqiinnarsimallugu.
Arsap piffissap ingerlanerani tyskit mååliinut iseqqinnissaa takorlooruminarsimavoq.
Unamminermilu minutsit arfineq marluk kisimik amingaataalersut 2-1-mik siuarput. Talerpiani backiusartoq Theresa Nielsenip isertitseriartarfiup tungaanut saassusseqataasimavoq, tassanilu taassuma Frederikke Thøgersenip arsaq tunniussaa isertissinnaasimallugu.
Danmarki tupaallatsitsillutik ajungaarnertik sisamanngorpat semifinalerlutik nangeriassavaat, tassani Østrig imaluunniit Spania unammissallugu.
/ritzau/