Arnat klubbiata ikiuiniarluni katersuiniarnerit iluatsitsiffigisarai
Ladies Circle Nuuk ukiut tamaasa Charity Dinnerimik aaqqissuisarpoq, tapersersorteqarneruleriartuinnarlunilu. Klubbip ukioq manna nereqatigiinnissamut aaqqissuinera Nuummi meeqqat innarluuteqartut immikkullu pisariaqartitsisut assammik arsaattartut peqatigiiffiannut, Håndbold Starzimut tapersersuinerussaaq.
Charity Dinner, tapersersuilluni nereqatigiissitsineq, ukiut tamaasa soqutigineqarneruleriartorpoq.
Suliniutillu aaqqissuisut tapersersorumallugit toqqarsimasaannut tamanna iluaqutaangaatsiartarpoq.
- Suliatta iluatsinnerata ukiut tamaasa annertunerujartuinnarnera qujanarpoq. Aningaasaliisartut Nuummeersut Kalaallit Nunaatalu sinneraneersut arlallit suleqatigaagut, pinnatassanik aningaasanillu tapiissutinik tunniussisarnerat tapersersuineruvoq pitsaasoq, Ladies Circle 72 Nuummi siulittaasoq, Line Bruun Jensen Sermitsiaq.AG-mut oqarpoq.
Ladies Circles 72 Nuuk Danmarkimi Ladies Circlemut peqataavoq, tapersersuiniaqatigiiffiullunilu. Ladies Circle Nuummiittoq nunatsinni tapersersuiniarluni nereqatigiissitsinerni ukiumut katersaqarnerpaasarpoq, tamannalu siulittaasup tulluusimaarutigaa.
Klubbip Håndbold Starz, Herningimi Lykkeligamut ukioq manna peqataarusuttoq tapersersorniarlugu aalajangerpoq.
- Håndbold Starz meeqqanut inuusuttunullu, peqatigiiffinnut allanut peqataasinnaanngitsunut periarfissaavoq. Meeqqat sapaatit akunneranut ataasiarlutik naapinnissaminnut periarfissaqartarput, meeraqatiminnullu ataatsimoorfeqarlutik. Tamanna pitsaasuutut isigaarput, meeqqallu innarluuteqartut immikkullu pisariaqartitsisut timersornissamik aamma pisariaqartitsisarnerat malunnarnerulersikkumavarput tapersersorusullugulu.
- Unammisartoqatigiit Lykkeligamut siorna unammiarusussimagaluarput, iluatsissimanaguli. Maanna neriuppugut ukioq manna Lykkeligamukarsinnaassasut, meeqqat innarluuteqartut unammiuaarnerannut peqataajartorlutik, Line Bruun Jensen oqarpoq.
Nereqatigiinneq
Nereqatigiissitsineq Charity Dinner Håndbold Starzimut tapersersuinerusoq Hotel Hans Egedemi aqagu arfininngornermi februarip arfineq-pingajuani ingerlanneqassaaq, Ladies Circle Danmarkimilu siulittaasoq aamma peqataassalluni.
- Ilisimavarput meerarpassuaqartoq immikkut pisariaqartitsisunik, naak arlaannik nappaateqarnerannik paasineqarsimanngikkaluartut. Taakkununngalu ataatsimoorfissaqartarneq iluaqutaasinnaavoq, pisussamut qaaqqusissummi allassimavoq.
- Aningaasaliisutsinniit tapersersuisorpassuaqarpoq. Aqagumullu qilanaarpugut. Siornatigut neriartortareersut peqataassapput, aammali nutaanik neriartortoqassaaq, tamannalu nuannerpoq. Pinnatassartalinnik unamminerit, akitsorterussinerit minnerunngitsumillu nerisassat mamarluartut naatsorsuutigineqarsinnaapput, Line Bruun Jensen pisussaq pillugu oqarpoq.
Charity Dinnerimi najukkami aliikkusersuisartut arlallit aliikkusersuissapput.
- Neriartortut, aningaasaliisut inuiaqatigiinnilu attaveqarfigut iluaqutigalugit, suliarput ukiut tamaasa iluatsissinnaasarmat qujamasuutigaarput, Line Bruun Jensen oqarpoq, ilisimatitsissutigalugulu aningaasaliinerit ukiut tamaasa annertuneruleriartortut.
Ladies Circle Nuup tapersersuilluni nereqatigiinnerni uku tapersersoreerpai:
- 2013: MIBB / Bedre Børneliv, ”Ringe i vandet” - 65.000 kr.
- 2014: Sanami meeqqat uninngavianni pinnguartarfik - 100.000 kr.
- 2015: Nanu Børn, Sisimiuni sukisaarsartarfik – 145.000 kr.
- 2015 + 2016: Ladies Circle Danmark peqatigalugu Nanu Børn, Sisimiuni sukisaarsartarfimmut katersuiniaqatigiinneq – 1 million kr.
- 2016: Nanu Børn, Sisimiuni sukisaarsartarfik – 150.000 kr.
- 2017: Meeqqat Ikiortigit ”meeraq kinaluunniit angerlarsimaffeqarnissamik pisinnaatitaaffeqarpoq” – 170.000 kr.
- 2018: FGB ”Najorti” - 171.000 kr.
- 2019: Kalaallit Røde Korsiat, – 207.000 kr.