Arnat isikkamik arsaannermi GM-ernerat taamaatitsinernik akornuserneqartoq

Holdini qulingiluani peqataaniarlutik nalunaarsimasuni holdit sisamaannaat arnat isikkamik arsaannermi GM-ernerannut ulluni makkunani Nuummi ingerlanneqartumut takkussimapput.

- KAK-p paasivaa avannaani pissartanngorniunnermi holdit taakku peqataasartut, tamanna siorna Qeqertarsuarmi pivoq, Kalaallit Arsaattartut Kattuffiat, KAK tusagassiuutinut nalunaarummi allappoq.

Holdit ukua taamaatissimapput: Uummannameersut UB-68, Upernavimmiit UB-83, Ilulissaniit N-48, Aasianniit T-41 Nuumminngaanniillu IT-79.

- Unammillernartoq annerpaaq tassaavoq angalanikkut unamminartut, angallannermut aningaasartuutit klubbinut KAK-muttaaq unamminerni peqataanissamut aporfiit annersarivaat. Assinganillu sungiusaqatigiinnernut, nunanik Kalaallit Nunaannut unammiarnissaannut qaaqqusinernut, nunap immikkoortortaaniittut unamminerinut, holdinik piukkunnaatilinnik pilersitsinernut suliniutinullu nutaanut atuuppoq.

Ippassaq pissartanngorniunneq unamminernik marlunnik aallartinneqarpoq.

Illoqarfimmi imminnut unammillertit Nûk aamma B-67 silami GM-erneq ammarpaat. Unamminermi Nûk siuaqqapput 11-0-imillu ajugaallutik, unamminermi Nûk-mi siulersorti Karo Dahl unammilluarnerpaattut toqqagaavoq.

Unamminerup aappaani pissartaasut Nuummeersut GSS I-69-ilu Ilulissaneersut unammipput. Unillatsiarnermi GSS 4-0-imik siuaqqavoq. Muminnerup kingorna kusanartumik aamma Asii K. Berthelsenip unammilluarnerpaap ajugaatitsineranik inerneqarpoq, 7-1-imik ajugaapput.

Ullumi Nuummi arsaattarfimmi GSS B-67-imut nal. 17 unammissappput Nûk-lu nal. 19 I-69-inut unammissallutik.