Arneriniarneq
Arnat Facebook-ikkut arneriniarfigineqartarput
AG-mi sapaatip akunnerani saqqummersumi inuiaqatigiinni oqallissaarisoq Naja Carina Steenholdtip oqaluttuaraa inuit nettimi naapittarfiitigut angutinit qaninniartunit malersorneqarluni. Aamma illit taamatut qaninniarfigineqarpit, taava AG attaveqarfiguuk
– Tinnersarneqartarnera qatsuteqaara, angutinit aappalinnit nulialinnillu, ilaallu allaat meeralinnit qaninniarneqartarnera!
– Maajunnaqaaq uannullu kamannaqaluni, taamaattumik saqqummiuttariaqarpara.
Taamatut qanittukkut oqarpoq AG-mi inuiaqatigiinni oqallissaarisoq isummersortartorlu Naja Carina Steenholdt facebookimi quppernermini. Tassani angutit namminerminut qaninniartut qunusaarpai aqqi tamanut saqqummiunniarlugit, eqqissisimatinneqarusukkami.
Naja Carina Steenholdt eqqoriarpaa Kalaallit Nunaanni arnat sooq Facebook-ikkut taama erloqinartigisumik malersorneqartut. Tassami taamatut pineqartartuni kisiartaanngilaq, politiillu akuttunngitsumik taamaasiortunik nalunaarfigineqartarsimapput.
Illit taamatut malersorneqaratsimaguit, imaluunniit tamanna isummersorfigerusukkukku AG-mut alllagit, piffissami aggersumi ajornartorsiut tamanna malersorniaratsigu. Uunga mail-ersinnaavutit redaktion@ag.gl imaluunniit sianerlutit 38 39 52-imut.