Arnat assammik arsartartut Puerto Ricomi aajuna anguniagaat

- Pitsaanerpaat pingasut akornanniissaagut.

Arnat assammik arsartartut nunanut allanut unammisartuisa sungiusaasuat, Johannes Groth, unammisartut Norcami pissartanngorniunneranni Puerto Ricomi siullermeerlutik aqagu sisamanngornermi unamminnginneranni taama oqarpoq.

Pissartanngorniunneq VM-imut anngunniunnissanut, Amerikap nunavittaani pissartanngorniunnernut anngunniunneruvoq, taanna aasaru Canadami ingerlanneqartussaavoq.

Nunat pingasut Norcami Puerto Ricomi pissartanngorniunnermi VM-imut anngunniunnissanut ingerlaqqissapput. Arnat nunanut allanut unammisartut aasaru Amerikap nunavittaani pissartanngorniunnernut peqataanissaq anguniagarigaat, Johannes Groth oqarpoq.

- Angusassamik toraagaqarluta sulinikuuvugut, taamaammat Canadami pissartanngorniunnermut ingerlaqqinngitsuussagutta naammaginassanngilaq, taanna Sermitsiaq.AG-mut oqarpoq.

Atuaruk: Arnat nunanut allanut unammisartut toqqarneqartut

- Unamminerit naligiiffiusorujussuusinnaapput. Taamaammat pissanganarpoq, Johannes Groth oqarpoq, unammisartullu maanna ukiut marluk matuma siornamut sanilliullugu pitsaanerusut erseqqissaatigaa.

- Unammisartut ukuinnaanngillat. Unammisartut 35-t akornanni unammilleqatigiinnermik pilersitsillutik sukataartoqarnikuuvoq. Unammisartullu siornatigornit sukataarnerunikuupput, tamannalu takuneqarsinnaavoq. Soorunami pissartanngorniunnerup aallartinnissaanut pissangavugut, kisianni pitsaasumut sangutillugu atorsinnaagipput qularinngilara, taanna oqarpoq.

Kiannera uuminarsinnaasoq
Puerto Ricomilu silap kiannerunera unammisartunut unammillernarsinnaasoq oqarpoq.

- Kisianni sungiukkiartorparput. Imerluartarnissaq, kiisalu sukkut taratsullu oqimaaqatigiissaarnerat unammisartunut pisariaqarpoq. Tassani timimik sungiusaasorput Berit Duus suleqatigilluarparput, taanna oqarpoq.

- Pissartanngorniunnerup aallartinnissaanut qanoq piareersarpisi?

- Ulloq ataatsimiinnermik naggasertuaannarparput. Ulloq sungiusarnerlu oqaluuseralugit, allanillu oqaluuserisassaqaraanga eqqartorlugit. Aqutsisut ullormut tulliuttumut pisussat saqqummiuttarpaat. Unammisartut ullormut programimik malitaqarput, sungiusarnerit marluk, eqqissisimaarnerit, soorunami aamma nerinerit. Unnukkut nuannersumik gruppikkaarluta sammisaqartarpugut. Kisianni ulloq sukkasoorujussuarmik ingerlasarpoq, ingammik taanna skema malikkaanni. Sisamanngorneq qanilliartupallappoq, aallartinnissarpullu qilanaarisorujussuuarput. Pissartanngorniunnissami angusarissaarnissarput neriuutigaarput, nunanut allanut unammisartunut sungiusaasoq Johannes Groth oqarpoq.

Norcami pissartanngorniunneq apriilip pingajuanni inissinniuttoqarnerani naammassissaaq.

Unammisartut unammiffissaat (kalaallit nalunaaqutaat malillugu):

• Sisamanngorneq nalunaaqutaq 19.30: Den Dominikanske Republik
• Tallimanngorneq nalunaaqutaq 19.30: USA
• Arfininngorneq nalunaaqutaq 21.30: Puerto Rico
• Sapaat: Semifinale
• Ataasinngorneq: Inissinniunnerit

Atuaruk: Najaaja A. Lyberth siulersortaassaaq