assammik arsarneq
Arnat assammik arsartartut målinik pingasunik ajorsartut
Nunatta assammik arsartartuisa arnartaat Puerto Ricomi unammeqqaarnerminni Den Dominikanske Republikimut ajorsarput
Assammik arsartartut nunanut allanut unammisartut arnartaasa Puerto Ricomi Norcami pissartanngorniunnermi unammeqqaarnerminni ajorsarput.
Nunanut allanut unammisartutta unammisaat, Den Dominikanske Republik 22-25-mik ajugaapput.
Kalaallit unammisartut aallartilluaraluarput, Kalaallit Nunaanni Assammik Arsartartut Kattuffiat ilisimatitsivoq.
- Arnartagut unamminermi aallartilluarput, tassani 6-2-mik siuaqqagaluarput. Ajoraluartumik unammisagut mumikkiartornermi unammillualerput, arnartagut periarfissagissaarlutik isertitsinngitsoortarnerat pissutaanerulluni, GHF allappoq.
Atuaruk: Arnat assammik arsartartut Puerto Ricomi aajuna anguniagaat
Sungiusaasoq pakatsisoq
Misigittaannerup amigaataanera ajorsarnermut aalajangiisuusoq sungiusaasoq Johannes Groth oqarpoq.
- Ajorsarneq pakatsinarpoq. Amerlasuutigut arsarnerput ajunngitsumik ingerlammat. 5-1-imik illersuineq taktikkimik sungiusarnikuusarput, piffissami ilarujussuani iluatsipparput. Isumaqatigiissutit atorpagut, periarfissarpassuarnik isertitsiffiginngisatsinnik pissarsivugut, tamatumalu ajugaatinngitsoorpaatigut, taanna oqarpoq.
Kisianni pissartanngorniunnermi unammisartut pitsaanerit pingasut akornanniinnissaat qularutiginngilaa.
USA unammissagaat
- Ajorpasinngilagut. Puerto Ricomut sungiusarluta unamminitsinnit annerusunik amerlanerusunillu periarfissaqartarpugut, misigittaannitta naammannginnera ajornartorsiutaavoq. Periuseq ingerlatarput ajunngitsuusoq qularnanngilaq, målit amigaataapput – unamminerni tulliuttuni takkutissasut qularnanngilaq. Uani pissartanngorniunnermi qanorsuaq pisoqarsinnaarpasippoq, Johannes Groth oqarpoq.
Pissartanngorniunnermi unamminerup aappaani Puerto Rico tupaallannartumik USA-mut 26-28-mik ajorsarpoq.
Kalaallit unammisartut USA nalunaaqutarput malillugu 19.30 unammissavaat.
Kalaallit isertitsisut ukuupput:
- Andrea Andreasen Karlsen 5
- Lykke Frank Hansen 4
- Najaaja Lyberth 4
- Kathrine Mikkelsen 3
- Mia Egede Rasmussen 2
- Anja Heilmann 1
- Ulla Kleist 1
- Sara Biilmann Egede 1
- Panu P. Grønvold 1