Skip to main content

Arnat assammik arsarluni nunanut allanut unammisartut sungiusaasortaarput

Johannes Grothip nunanut allanut unammisartunut sungiusaasutut suliassaa siulleq tassaavoq Ilulissani GM-eqarnera najuuffigissallugu

Johannes Groth 27-nik ukiulik Sisimiormiu, ukiuni kingullerni GSS-ip angutitaanik arnartaanillu sungiusaasuusimasoq, arnanut nunanut allanut unammisartunut sungiusaasutut atorfinitsinneqarpoq.

Atorfik piumasaqarfiusoq

– Kalaallit Nunaanni Assammik Arsartartut Kattuffianni qularinngilluinnarparput nunanut allanut sungiusaasutut atorfimmut piumasaqaateqarfiusumut pissanganartumullu eqqorluinnartoq atorfinitsissimallutigu. Sungiusaasunngortoq Amerikap Nunavissuani Pissartanngorniunnermi angusarissaartitsiniassaaq, nunatsinnilu assammik arsarnermik ineriartortitseqataassalluni, kattuffik erseqqissaavoq.

Ukiunut marlunnut atorfinitsitaavoq

Johannes Groth ukiunut marlunnut isumaqatigiissuteqarfigineqarpoq ukiortaamiillu atorfinitsinneqarsimalluni, Jakob Andreassen paarlallugu.

Nunatsinni pissartanngorniunneq

Pisortatigoortumik Johannes Grothip suliassaa siulleq tassaavoq BankNordik GM 2016-imi, Ilulissani ingerlanneqartussami, najuunnissaq, taannalu ingerlanneqassaaq apriilip 23-anniit apriilip 28-annut.

Piumassuseqassapput

– Soorunami sungiusaasutut atorfinitsinneqarnera nuannaarutigeqaara tulluusimaarutigalugulu. Nunanut allanut unammisartunut sungiusaasumut ikiortaasimavunga. Tamanna akisussaaffilerujussuuvoq. Unammisartut aallaqqaataanit paasissavaat sungiusaasutut piumasaqartuusunga. Tamanna peqatigalugu kikkut tamarmik nunanut allanut unammisartut piukkunnaateqarsinnaapput. Holdi piumassuseqarluartuussaaq. Taamaattumillu ukiuni tulliuttuni marlussunni amerlasuut akulerutsittariaqarpavut. Piumasaqaatit malinneqarpata aappaagu Amerikap Nunavissuani Pissartanngorniunnermi angusarissaarsinnaavugut, tusagassiorfinnut nalunaarut malillugu Johannes Groth erseqqissaavoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER