Arnat assammik arsarluni nunanut allanut unammisartut 16-it USA-mukarput

Amerika avannarlermiut Caribiamiullu assammik arsarnermi pissartanngorniunnerat
sapaatiuppat aallartissaaq. Tassani kalaallit nunanut allanut unammisartut arnartai
peqataassapput. Unammersuaarnermi ajugaasut nunarsuarmi pissartanngorniunnermi
Spaniami decembarimi pisussami anngutissapput.

Kalaallit Nunaat, USA, Puerto Rico aamma Mexico unammersuaarnermi peqataassapput,
tassanilu ajugaasoq VM-imut anngutissalluni.

Ataqatigiilluarneq

Nunanut allanut unammisartut USA-mi Chicagoliannginneranni sungiusaasoq Anders Friis Sermitsiaq.AG-mit oqaloqatigineqarpoq.

- Sungiusarnikuusagut malillugit unammisaqattaarnissarput unammersuaarnermi
naatsorsuutigaara. Qanoq unammeriaaseqassanerluta pilersaaruteqarpugut.
Unammersuaarneq naammassippat immitsinnut oqarfigisinnaasariaqarpugut sapinngisarput
tamaat atorlugu unammisimalluta, taanna Sermitsiaq.AG-mut oqarpoq.

Nunanut allanut unammisartut Danmarkimi Bjerringbromi sungiusaqatigeeqqammerput.
Unammisartut ataqatigiilluartut nunanut allanut unammisartunut sungiusaasup
maluginiarpaa.

- Unammisartugut aamma assigiinngitsunik piginnaaneqarput. Piginnaaneri
unammersuaarnermi saqqummerluarnissaat sungiusaasutut suliassarissavarput.
Unammisassagut ilisimasaqarfigivallaanngilagut, taamaattumik unammersuaarnissami
tamanna unammillernarnerpaassaaq. Suut pikkoriffiginerigut ilisimalluarnissaat
taamaattumik pingaaruteqarpoq, Anders Friis oqarpoq.

Unammisartut tamarmik sukataassapput

Unammersuaarnermi qanoq angusaqassanerlutik sungiusaasup nalileruminaatsippaa.

- Susoqassanersoq aamma unammersuaarnerit allat pillugit susoqarsimanersoq
eqqoriaasaqattaarsinnaavugut. Taamaattoq unammisassagut ilisimasaqarfigivallaanngilagut, taamaattumik qanoq naliliissanerlunga oqarsinnaanngilanga. Unammersuaarnermi ajugaaniarluta aallarpugut. Tamanna upperisimanngitsuugutsigu peqataasimanavianngikkaluarpugut. Cuba uagutsinnit pitsaanerusut nalunngereerparput, taamaattumik ajugaanissamut periarfissagut qaffapput taakku unammersuaarnissamut peqataaniarnatik nalunaarmata, Anders Friis oqarpoq.

- Pisinnaasagut malillugit unamminngikkutta pakatsissaanga. Soorunami uagutsinnit
pitsaanerusunut ajorsassagutta akuerissavara. Unammisartut tamakkiisumik
unammersuaarnermi takutitsinngippatali pakatsissaanga, nunanut allanut unammisartunut
sungiusaasoq Anders Friis oqarpoq.

Kalaallit Mexicomut sapaatiuppat unammissapput. Taanna pereerpat USA aamma Puerto
Rico unammissavaat. Pissartanngorniunneq pingasunngorpat unammissutigineqassaaq.

Kalaallit Nunaannit unammisartut peqataasussat:

Rina Møller Lorentzen
Nivi Fly
Anja Heilmann
Nuunu-Marie Lukassen
Andrea Heilmann
Aviana Kâjangmat
Lykke Frank Hansen
Ivalu Bjerge
Kathrine Mikkelsen
Josefine Gadgaard
Pilunnguaq R. Wille
Christina V. Lange
Sandra Rothberg
Ivâna Meincke
Ivaana Holm
Geerdaaraq I. Geisler