Arnat assammik arsaattartut anngunniunnissaamut piareersarneqartut
Timersoqatigiiffiit assammik arsaattartut kattuffiat arnat nunanut allanut unammisartut sungiusaasuata ikiortaanik atorfinitsitsivoq. Taanna aasamut VM-imut anngunniuttoqarnissaanut piareersaaqataassaaq.
Kim O. Petersen arnat assammik arsaallutik nunanut allanut unammisartut sungiusaasuannut ikiortitut atorfinitsinneqarpoq. Arnat VM-imut anngunniunnissaannut piareersarnermut taanna ingerlatseqataasuussaaq.
TAAK tusagassiorfinnut taama nalunaaruteqarpoq.
- Kattuffimmit nuannaarutigaarput Kim O. Petersen isumaqatigiissuteqarfigigatsigu. Kim O. Petersen arnat anngunniutivinnissamut, Nuummi 4.-11. juni ingerlanneqartussamut sungiusaanermik ingerlatsissaaq, TAAK-imi siulittaasoq, Carsten Olsen oqarpoq.
Unammisartoq misilittagaqartoq
Kim O. Petersen assammik arsaannermik misilittagaqarluarpoq. GSS-isimi unammeqataasarpoq, arnanilu pissartanngortartuni GSS-isimi sungiusaasuulluni. TAAK ilisimatitsivoq Kim O. Petersen sungiusaasutut kajumissutsimillu suliaqartutut tunniusimalluinnartuusoq.
- Kimmip annermik suliassaraa nunatsinni unammisartut pitsaanerpaanngornissaat, sungiusaasoq Anders Friis ataatsimut akisussaasutut inissisimassalluni, Carsten Olsen nassuiaavoq.
Kattuffik ilisimatitsivoq arnat assammik arsaattarnerat inerisarniarlugu nunatsinnilu siuarsarniarlugu isumassarsianik sulisoqartoq. Unammisartut inuusunnerusut aamma sammineqarput, tassani sungiusaasussamik ujaasisoqarluni.
Kim O. Petersenip sungiusaasutut ilanngunnerani TAAK-imi sungiusaasut nunatsini najugaqartut maanna tallimaalerput.
Nunanut allanut unammisartunut sungiusaasut pikkorissarneqarnissaat aamma qanillilluinnarpoq.
