Skip to main content

Arnat assamik arsaattartut VM-ertoqarnissaanut suli periarfissaqartut

Canadap Pan Amerikanske Mesterskabini peqataasinnaanani nalunaaruteqarnerata kingorna, kalaallit unammisartui pissartanngorniunnernut aggersagaapput. Taamaakkaluartoq unammisartut Argentinamut angalanissaat akissaqartinneqarnersoq apeqqutaavoq

Arnat assammik arsaallutik nunanut allanut unammisartut nunarsuarmi pissartanngorniunnernut anngunnissaminnut suli periarfissaqarput.

Puerto Ricomi Norcami unammiuaarnerni sisamaattut inissikkamik De Pan Amerikanske Mesterskabinut peqataanissamut periarfissaarukkaluarput. Tassani pissartanngorniutivinnerni VM-imut aamma anngunniuttoqartarpoq, pissartanngorniutivinnerit juunip qaammataani Canadami ingerlanneqarnissaa pilersaarutaasimangaluarpoq.

Canada peqataasinnaajunnaartoq

Canada pissartanngorniutivinnernut peqataasinnaajunnaarluni nalunaaruteqarsimasoq paasissutissiarineqarpoq, pissartanngorniutivinnerillu Argentinami ingerlanneqartussanngorlutik.

Unammisartut VM-imut peqataanissaq angorusullugu sukataassasut, nunanut allanut sungiusaasoq, Johannes Groth, Sermitsiaq.AG-mut oqarpoq.

- Norcami unammiuaarnerni unamminerit tamaasa ajorsarfigigaluarlugit misigisimavugut unammisagut unammillerluarsinnaallugit. Unamminerni aalajangiisinnaaneq amingaatigilaarsimavarput, misilittagaqarluarnerulaarsimanguttali angusarissaarnerusinnaangaluarluta.

- Unamminerni aalajagiinissamut periarfissaqartaraluarta atorluartarsimanngilagut. Unamminerni ajorsarluta misigisimaneq ajorpugut, ajugaanissamulli periarfissat atorluanngitsuuginnartarsimallutigit. Massakkut unammisartut misilittagaqarnerulaarnerisa kingunerisaannik ajugaaffigisinnaallutigit misigisimavunga, Johannes Groth oqarpoq.

Aningaasat pissarsiarineqaqqaassapput

Arnallu unammisartut Argentinamut aallassanersut suli aalajagiunneqanngilaq.

- Elite Sport Greenland aningaasaleeqataanissamut periareersimavoq, taamaakkaluartoq taakku aningaasaliisinnaanerat killeqarpoq. Taamaammat Kalaallit Nunaanni Assammik Arsaattartut Kattuffiata aningaasanik nassaarsinnaanera apeqqutaavoq, una sapaatip akunnera ingerlanerani Pan Amerikanske mesterskabinut peqataassanerluta aaqqissuisut nalunaarfigineqartussaapput, taanna oqarpoq.

Unammisartoq pingaarutilik aqqunaqqasoq

- Unammisartut Argentinamukassappata, pissartanngorniutivinnernut, tunuarsimasoq Anja Salsø, peqataassanersoq qularnarpoq.

- Taanna Norcami unammiuaarnerni ajoraluartumik seeqqumigut aqqunarsimavoq, taamaammat qularnaqarpoq taanna peqataassanersoq. Unammisartulli allat uterattali sungiusartuarsimapput, pissartanngorniutivinnernulli piareersimasut, Johannes Groth oqarpoq.

Pan Amerikanske Mesterskabini unammisartut aqqaneq marluk peqataassapput, tassani angusarinnerpaat pingasut nunarsuarmi pissartanngorniutivinnernut anngutissallutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER