Ukiumut nalunaarusiaq
Arnat amerlanerusut pinngitsaalineqartarput meeqqallu eqqunngitsuliorfigineqartarlutik
Ukiuni tallimani kingullerni pinngitsaaliilluni atoqateqarnermut aamma meeqqanik 15-it ataallugit ukiunilinnik atornerluineq nalunaarutiginnittarnerit 2016-imi amerlatigipput. Illoqarfimmilu Tasiilami ajornartorsiut innuttaasut amerlassusaannut sanilliullugu qaffasissorujussuuvoq.
Politiit ukiumut nalunaarusiaanni saqqummiunneqaqqammersumi tamanna atuarneqarsinnaavoq.
Nalunaarusiaq qimerlooraanni, Nunatsinni politimesteri Bjørn Tegner Bay, sooq ernumassuteqarnersoq paasineqarsinnaavoq.
2012-minngaanniik 2016-imut pinngitsaaliilluni atoqateqartarnerit 142-nit 151-inut amerleriarput. Arnaannaanngitsut tassani naalliutsinneqartarput. Meeqqat 15-it ataallugit ukiullit kanngutsaatsuliorfigineqartartut piffissami siorna 79-iugamik aatsaat taama amerlatigipput, siullermik amerlanerpaagamik 70-iusimagaluarput.
Tasiilaq pinngitsaaliiffiuvoq
Illoqarfiit immikkoortiternerini Tasiilaq naak inuttunngikkaluarluni immikkut ittunik ajornartorsiuteqarpoq. Pinngitsaaliilluni atoqateqartarnerit 29-iupput, meeqqanillu 15-it ataallugit ukiulinnik kanngutsaatsuliornerit 30-iullutik. Illoqarfiit pingaarnersaannut 17.000-nik inoqartumut sanilliukkaanni kisitsisit 28-iullutillu aamma 12-iupput.
Ukiuni tallimani kingullerni kinguaassiutitigut atornerluilluni pinerluuteqartarnerit 25 procentimik amerleriarput, tassa 2012-imi 304-nit 2016-imi 381-inut. Kinguaassiutitigut atornerluilluni pinerluuteqartarnerit makkuupput:
- Pinngitsaaliilluni atoqateqarnerit
- Kinguaassiutitigut atornerluineq
- Meeqqamik 15-it inorlugit ukiulimmik kinguaassiutitigut atornerluineq
- Inummik 18-it ataallugit ukiulimmik kinguaassiutitigut atornerluineq
- Kanngutsaatsuliorneq
2016-imi toqutaasut pingasut
Siorna inuit pingasut toqutaapput, 2012-imilu arfineq-marluk toqutaallutik, piffissamilu ukiuni tallimani nakuuserneq pillugu nalunaarutit 750-nit siorna 780-inut amerleriaramik aatsaat taama amerlatigipput.
- Kalaallit Nunaanni innuttaasut Danmarkimi innuttaasunut sanilliukkaanni 31/2-mik amerlanerusunik nakuusernermut unnerluutiginnittoqartarpoq, aamma kanngutsaatsuliornermut pinerluuteqartarnerit quleriaammik amerlanerupput, taamaattumik pinerluuteqarnernut tamakkununnga iliuuseqarneq salliutinneqartariaqarpoq.
Aamma atuaruk: Politiit: Pinerluuteqartut 2016-imi amerleriarneranni pitsanngoriaat ataasiinnaavoq