Arnat amerlanerit umiartortunngorpata nuannarissagaluarpara
Claudia Eldevig Eriksen 26-nik ukioqarluni aalisariutinut naalakkatut fiskeskipper af 1. graditut imminut taasinnaanngorpoq. Arnani siullersaalluni qaffasinnerpaamillu 12/A-mik karaktereqarluni kiisalu maligassiuilluartuunini pissutigalugu akissarsisinneqarluni.
Claudiamut alloriarnerujussuuvoq. Imaanngitsoq arnaagami, oqaloqatigiinnitsinni erseqqissaqqittuakkamisut. Kisianni ukiorpassuanngulersuni Kalaallit Nunaanni aalisarnermik inuussutissarsiornermi pingaarutilimmik inissisimaffeqalernissamik takorluugaqarsimagami. Taamaassimavoq nalunngikkaluarlugu Kalaallit Nunaanni kilisaammi avataasiummi aalisartuuneq amerlanertigut inuunerusartoq peqqarniitsoq. Aviisi AG Inuit-mi sapaatip-akunnerani matumani saqqummersumi taamatut allappoq.
Qaammatinik sivisussusilinnik ungasissumut angalasarnerit silalu qanorluunniit ikkaluaraangat ilungersunartumik sulisarnerit atugassarititaasunut ilaapput. Taamaattumik inuussutissarsiummi angutit malunnaateqarfiginerusaanni tassani arnanik inuttaasunik takussaasoqarpallaartanngilaq. Pingaartumik aquttarfimmi. Kisianni Claudiamut tamanna unammilligassanut suli allanut ilaaginnarsimavoq.
Taassuma isumaata akerlianik, Kalaallit Nunaanni arnani siullersaalluni aalisariutit naalagaattut fiskeskipper af 1. graditut ilinniagaqarsimanermi immikkut pineqarnissaanik isumaqannginnermut sanilliullugu, aalisariutaatileqatigiiffimmi suliffigisaani Polar Seafood Greenlandimi tamanna allaanerulluinnartumik isigineqarpoq.
- Inuttaa tulluusimaarutigisorujussuuarput, aalisariutaateqarnermut pisortaq Hans Jørgen Kuluk Egede erseqqissaavoq.
- Suliaqarfitsinni arnat kilisaatini aqumiutut ilinniagaqartarnerat immikkuullarilluinnartuuvoq. Immaqa oqarsinnaanngilagut, taanna nunarsuaq tamakkerlugu siullerpaajusoq, kisianni qanorluunniit pisoqaraluarpat Kalaallit Nunaanni siullerpaajuvoq. Umiarsuarnut niuffagiutinut, aqumiut akornanni arnat arlallit suliffigisaannut, sanilliullugu avataasiorluni aalisarnermi allanik inuttut nammineq tusagaqarsimanngilanga. Danmarkimi nunaniluunniit allani aalisarnermik ingerlatsisutut sanilliukkumasartakkatsinni.
- Suliaqarfimmi avatangiisini inuusunnerusut arlaqarneruleriartuinnartut aqumiuni ukiuni aggersuni malunnaateqarneruffigileriartuaagassaanni sulinerata ingerlaqqinnerata malinnaaviginissaanut qilanaarpugut. Ilinniartitaanikkut pilersaarusiarput, Polar Seafoodimi ukiuni arlalinngortunik aqumiussanik nammineerluta toqqartuilluta ilinniagaqartitsivigisimasarput, iluatsilluartorujussuusimavoq, aamma aqumiut akornanni taakkunani Claudiap takunissaanut qilanaarpugut”, Kuluk Polar Seafoodip Nuummi qullersaqarfianeersoq, oqarpoq.
Oqaluttuaq tamaat AG-mi sapaatip-akunnerani matumani saqqummersumi atuaruk, ugguuna iserfigisinnaavat: