Arnaqquassaartitsinerit sumiiffinni assigiinngitsuni unitsinneqartoq

Sialuk anorilu Nanortalimmi Nuummi sumiiffinnilu assigiinngitsuni arnaqquassaartitsinissaraluit unitsippaat. Sumiiffinnimi assigiinngitsuni kiaganilu seqinninngilaq. Tasiilamilu aasarissinerani ikumaartitsisoqarsinnaalluarpoq.

Ilulissani kujataanni tunumilu aasaanera aallartilluarpoq. Seqinnillattaavormi. Nunattalu kitaa aasarsiorniarneq ilungersunarneruvoq. Dmi-p silasiutaa naapertorlugu kitaa tamakkingajallugu siallerpoq anorlingaatsiarlunilu. Sumiiffit ilaanni sakkortuumik anoraassuartarpoq.

Nanortalimmi Brugseni arnaqquassaartitsinissaq sila peqqutigalugu taamaatikkaat facebookimini nalunaarutigaa. Nuummilu Sømandshjemmet-mi aaqqissuusineq aamma taamaatinneqarpoq. Sømandshjemmet-lu Nunatsinniit Sankt Hans pillugu DR1 aallakaatitassiaanut 'Fællessang'-imut inuulluaqqusisimallutik paasissutissiissutigaat. Inuulluaqqusinerat toqqaannartoq nalunaaqutaq 15:30 takuneqarsinnaavoq.

Aasaanerani arnaqquassaarneq aasaanerani katerisimaarfigineqartarpoq. Tamannalu europami ukiuni hunnorujulikkaani ileqquuvoq. Ikumaartitsisoqartarpoq Sankt Hansilu nalliussiniarlugu unnukkut arnaqquassaartoqartarluni.

Arnaqquassaarnermik nalliussisarneq Kalaallit Nunaanni ileqqorineqarpallaanngilaq. Tamatumunngalu pissutaagunarpoq Inuiattut ullorsiortarnermut soorunami pingaarnerutinneqartumut qanittunnguummat. Inuiattut ullorsiortarneq 1985-imi atuutsinneqalinnginnerani amerlanerit Sankt Hans Nunatsinni nalliuttorsiutigisarsimavaat.

Sankt Hans nalliuttorsiutigissallugu Tunumi Aasianniillu Qaanaaq tikillugu sila ikumaartitsinissamut atoruminarpoq.

Powered by Labrador CMS