Arnaq unnerluutigineqartoq: Nakuuserneq, imigassartorsimalluni biilersimaneq toqutseriarsimarnerlu

Arnaq pissutsini katillugit 25-usuni unnerluutigineqarpoq - ilaatigut nakuusersimasutut, imigassartorsimalluni biilersimasutut kiisalu Inatsisartuni ilaasortamut persuttaanissamik sioorasaarisimasutut unnerluutigineqarluni.

Nuummi juulip qaammataani aasarisseruttortoq aqqusinermi annilaarnartumik pisoqarsimavoq, tassani angut 45-nik ukiulik savimmik kapineqarpoq.

Angut arnamik malersorneqarluni aqqusinermi uppeqqajaalluni ingerlasimavoq. Assamigut illuttulluunniit assamigut aanaarsimavoq, angut arnarlu marluulluik aalakoorpasittut, taamanikkut takunnissimawsoq Sermitsiaq.AG-mut oqaluttuarsimavoq.

Januaarip aallartinnerani suliaq eqqartuussivimmi suliarineqassaaq. Arnaq 31-nik ukiulit toqutseriarsimasutut unnerluutigineqarpoq.

Unnerluussummi allassimavoq, arnap angut sakiaata saamiatungaatigut savimmik uullissummik 25 cm-isut takitigisumik savissartalimmik kapisimagaa. Angut kapineqarami puaa saamerleq putulluni silaannaarussimavoq, taamalu inuunermut ulorianaatilimmik ajoquserluni. Tamanna unnerluussummi Sermitsiaq.AG-mit takuneqarsimasumi allassimavoq.

Qimaasimasoq

Arnaq aamma 'kapooqqissavakkit?' kiisalu 'kapeqqissavakkit?' oqariarluni innuttaasut saneqquttut nilliaffigilermanni qimaasimasutut unnerluutigineqarpoq.

Arnaq pisup kinguniatsiannguatigut tigusarineqarsimavoq, politiillu ilisimatitsissutigaat tunngaviusumik inatsit naapertorlugu killisiuisoqarmat arnap angummik kapisisimanini nassuerutigisimavaa, toqutsinissaminilli siunertaqannginnerarsimalluni.

Arnaq pissutsini arlalippassuarni unnerluunneqarsimammat eqqartuussinissamut ullut tallimat immikkoortinneqarsimapput.

Pissutsit pineqarut tassaapput arlaleriarluni tillittarsimaneq, tillinniaraluarsimaneq, qarasaasiami paasissutissatigut peqquserlunneq nakuusersimanerlu. Tamakkua saniatigut Inatsisartuni ilaasortamut pineqartup qinikkatut suliaqarneranut atatillugu qunusaarisimasutut aamma unnerluunneqarpoq.

Ukiuni sisamani qaammatinilu arfinilinni pineqaatissinneqarnissaa anguniarneqartoq

Unnerluussut naapertorlugu arnaq Inatsisartuni ilaasortamut Messengerikkut ilaatigut allassimavoq: 'Arnapalaavaraq taannaqa takunissat. Isateruloornissannut piareersimagit.'

Arnaq aamma imigassartorsimalluni biilersimavoq, politiit naapertorlugit arnq ukioq manna martsip qaammataani imigassartorsimalluni biilerami 1,73 promillemik aava imigassamik aalakoornartulimmik akoqarsimavoq. Arnaq pineqartoq aamma biilersinnaannermut allagartaqanngilaq.

Unnerluussisup anguniarpaa arnaq ukiuni sisamani qaammatinilu arfinilinni pineqaatissinneqarsimasut inissiisarfianiittussanngorlugu eqqartuunneqarnissaa. Tamatuma saniatigut aqqusinertigut angallannermi inatsimmik unioqqutitsisimasutut 20.000 koruuninik akiligassinneqarnissaa kiisalu katillugit 86.000 koruuninik taarsiissuteqarnissaa piumasarineqarpoq.

Arnap illersuisuata Sermitsiaq.AG-mut ilisimatitsissutigaa, arnaq unnerluussutigineqartunut oqaaseqarusunngikkallartoq.

Powered by Labrador CMS