Arnaq uiminik toqutsisutut piffissaligaanngitsumik tigummineqassasoq piumasarineqarpoq

Arnaq 43-nik ukiulik uiminik savimmik puttummillu toqutsisimasutut unnerluutigineqarpoq. Tamatuma saniatigut arnaq angummut arlaleriarluni nakuusersimasutut unnerluutigineqarpoq.

Ataasinngornermi Tasiilami eqqartuussineq aallartissaaq, tassani arnaq uiminik 3. januar 2022-mi toqutsisimasutut unnerluutigineqarpoq.

KNR taama allaaserisaqarpoq.

Toqutsineq Tasiilami inissiami pivoq, arnarlu siullermik angutip kiinaatigut tillullugu qingaatigut aalersissimaneranik unnerluutigineqarpoq.

Tamatumalu kingorna allagaq unnerluussut naapertorlugu angut puttummik tuimigut, talimigut nissumigullu kapineqarpoq, Toqutaasoq sakissamigut pingasoriarluni savimmik kapineqarluni toquvoq. Tamanna aanaassutigingaatsiaramiuk toqqutigaa, KNR allappoq.

Arnaq toqutsinerup saniatigut angummut siornatigut arlaleriarluni nakuusersimasutut, inunnullu allanut marlunnut nakuusersimasutut unnerluutigineqarpoq.

Arnaq piffissaligaanngitsumik tigummigallarneqartussanngussasoq, unnerluussisussaatitaasut piumasaraat.

Arnaq taamanikkut angutip Tasiilami inissiami siorna 3. januar toqungasup nassaarineqarneranut atatillugu tigusarineqarpoq.

Powered by Labrador CMS