Arnaq toqutsisimasutut persuttaasimasutullu eqqartuussaalluni ukiuni arfineq-pingasuni pineqaatissinneqartoq

Tasiilami toqutsisimaneq pillugu eqqartuussinermi pingasunngornermi aalajangiisoqarpoq. Unnerluutigineqarsimasoq ukiuni arfineq-pingasuni pineqaatissinneqarsimasunut inissiisarfimmiittussanngorlugu kiisalu toqutaasup unnerluutigineqartullu meeraannut sisamaasunut taarsiisussanngorlugu pineqaatissinneqarpoq.

Retsm'det foregik i Sermersooq Kredsret i Tasiilaq.

Arnaq 43-nik ukiulik Tasiilami aapparminik siorna toqutsisimasutut, taassumalu saniatigut aapparminut qitornaminullu arlaleriarluni persuttaasarsimasutut, eqqartuussivimmit pineqaatissinneqarpoq.

Unnerluussut naapertorlugu toqutsineq 3. januar 2022 ualikkut pivoq, arnap angut sakiaatigut savimmik arlaleriarlugu kapisimammagu. Arnap angut puttummik arlaleriarlugu kapisimagaa aamma unnerluussummi ilaatinneqarpoq. Puttummi angutit DNA-vanik nassaassaqanngimmat unnerluussut taanna eqqartuussivimmi atuutsinneqanngilaq. Kalaallit Nunaata Politiivini unnerluussisussaatitaasoq Alexander Stürup Sørensen Sermitsiaq.AG-mut taama ilisimatitsivoq.

Unnerluussisussaatitaasup piumasarigaluarpaa unnerluutigineqartoq piffissami aalajagingaanngitsumi pineqaatissinneqassasoq, eqqartuussiviulli aalajangerpaa arnaq ukiuni arfineq-pingasuni pineqaatissinneqarsimasunut inissiisarfimmiitinneqassasoq.

- Aalajangiunneqartoq iluarisimaarluinnarpara. Toqutsisoqarsimatillugu pineqaatissiissut ukiut arfineq-marluusarput, arnarli angummut persuttaasimasutut siornatigut pineqaatissinneqareersimammat, suliamilu uani persuttaanermut tunngasut ilanngullugit pineqaatissiissut ukiunut arfineq-pingasunut inissinneqarpoq, Alexander Stürup Sørensen oqaluttuarpoq.

Arnaq angutip naavatigut savimmik kapisisimasutut 2018-imi pineqaatissinneqareersimavoq.

Suliassanngortitseqqinnissani eqqarsaatigaa

Unnerluutigineqartoq illersuisullu ukiuni arfineq-pingasuni pineqaatissiissut akueraat, unnerluussisussaatitaasulli eqqartuussutip aalajangerneqarnera isumaliutigeqqaassallugu nalunaarutigaa, piffissami killiligaanngitsumi pineqaatissinneqarsinnaaneq kissaatigigaluaramiuk.

Eqqartuussutini nakorsat siunnersuisoqatigiivisa innersuussutaat, tassa piffissami aalajagingaanngitsumi pineqaatissiinissaq ajornakusoorsinnaasoq, eqqartuussisut immikkut maluginiarsimavaat.

- Eqqartuussinerni nakorsat siunnersuisoqatigiivisa nalilerpaat arnat imigassartorsimatinnani inoqatiminut ulorianartorsiortitsinavianngitsoq, imigassartorsimatillugu persuttaanerit toqutsinerlu pisimammata, Alexander Stürup Sørensen oqaluttuarpoq.

Kitaamiusut oqaluttumik nutserisoqartoq

Ilanngullugu maluginiarpaa arnap tarnikkut misissorneqarnerani kalaaleq kitaaneersoq nutserisutut atorneqarsimasoq, tamannalu tunngavigalugu oqaatsitigut akunnattoorfiusinnaasut pissutigalugit misissuinerup inernera sunnerneqarsimasinnaasoq.

Arnaq ukiuni arfineq-pingasuni pineqaatissinneqarnerup saniatigut aapparisanilu qitornaminnut sisamaasunut, taarsiisussanngorput. Meeraasut tamarmik 18-it ataallugit ukioqarput. Taarsiisussanngortitsineq 800.000 koruuninut nalilerneqarpoq.

Arnaq unnerluunneqarnermini suliani marluusuni tamakkiisumik ilaannakortumilluunniit pinngitsuutinneqarpoq.

Powered by Labrador CMS