toqutsineq
Arnaq toqutsisimasutut pasineqartoq ulluni 28-ni tigummigallarneqartoq
Arnaq ataasinngornermi toqutsisutut tigusarineqareerluni, marlunngornermi eqqartuussisumut sassartinneqarpoq.
Annonce
Angut Nuussuarmi inissiami nassaarineqarnerata kingorna, Nuummi poliiit ataasinngornermi ullaakkut arnaq toqutsisutut tigusaraat.
Arnaq marlunngornermi tunngaviusumik inatsit tunngavigalugu killisiorneqarpoq, tassanilu eqqartuussisup arnaq ulluni 28-ni tigummigallarneqartussanngorlugu aalajangerpoq.
KNR taama allappoq.
Arnap nammineerluni peqqinnissaqarfik ataasinngornermi ullaakkut attaveqarfigisimavaa. Ambulance inissiamut apuummat, annaassiniaasartut angut toqungasoq nassaaraat.
Kingorna arnaq tigusarineqarpoq, toqutsisutullu unnerluutigineqarluni.
- Toqutsinertut misissorparput. Tassani savimmik nassaartoqarpoq, taannalu toqutsissutaasimasinnaasutut misissorparput, pigaartoq Gideon Quist KNR-imut oqarpoq.