Skip to main content

Arnaq indiamiu inuusuttoq: Nammineq timmisartorluni nunarsuarmik kaajallaasoq

Arnaq indiamiu inuusuttoq nunarsuarmi rekortileeqqammerpoq. Tassa arnani siullersaalluni kisimiilluni timmisartuaqqamik aquttuulluni sermersuaq ikaarlugu timmisartoqqammerpoq, maannalu Nuummiilluni.

Hotel Hans Egedep sutorniartarfiani arnaq tuattoq indiamiu issiavoq. Angerlarsimaffimminiit ungasittorujussuarmiippoq.

Taannaavoq arnani timmisartortartuni siullersaalluni sermersuaq qulaallugu timmisartuaqqamik kisimiilluni ikaarsimasoq. Taamaasilluni nunarsuarmi rekortiliivoq.

- Avammut saqqummiussassaqarlunga maaniippunga. Suleqatikka Mumbaimiittut maanna aningaasanik katersuinialeruttorput, arnat inuusuttut 100-t akissaatikittut ilinnialernissaat anguniarlugu. Nunarsuaq kaajallallugu timmisartuaqqamik ingerlaarpunga, suliniutip malugineqarnissaa anguniarlugu, Aarohi Pandit Sermitsiaq.AG-mut oqaluttuarpoq.

Privatfoto

Aarohi Pandit 23-nik ukioqarpoq, Indiameersuulluni timmisartortartuullunilu. Inuusukkaluarluni timmisartornermik misilittagaqarluarpoq. 17-inik ukioqarluni timmisartumik aqunnermik sungiusalersimavoq, 19-inillu ukioqarluni timmisartuni anginerni timmisartortartunngorsimalluni. 21-nik ukioqarluni timmisartuaqqat mikinerit aqussinnaanerannut allagartartaarsimavoq, arnani Indiami siullersaalluni.

Timmisartuararlu taama ittoq atorlugu maanna nunarsuarmik kaajallaanialerpoq. Indiamiit Kalaallit Nunaannut ullut 51-it atorlugit angalasimavoq, naatsorsuutigalugulu ullut 40-t qaangiuppata Indiamut tikeqqissalluni.

- Misigisaq tupinnaqaaq. Angalananinni misigisara nuannernerpaaq tassaavoq sermersuaq qulaallugu timmisartorama. Sermersuaq qaqortuinnaq qulaaqqullugu takusaq tupinnaqaaq, oqarpoq.

Aarohi Pandit nunarsuaq kaajallallugu timmisartussaguni taava rekortileeqqissaaq. Taamaasilluni arnani timmisartortatuni siullersaalluni timmisartuaqqami timmisartorluni nunarsuaq kaajallassagamiuk.

Katersuiniarneq

Anguniagaraa timmisartuaqqamik timmisartorluni nunarsuaq kaajallallugu angalanissani, taamaasillunilu rekortiliilluni. Allamilli aamma anguniagaqarpoq. Arnat indiamiut inuusuttut 100-t ilinnialernissaat anguniarlugu aningaasanik katersuiniartut ilisimaneqarnerulernissaat anguniarpaa.

- India nunaavoq ineriartupiloortorujussuaq. Ineriartorneq ajunngitsumik ingerlassappat arnat angutituulli assigiimmik periarfissaqartariaqarput, Aarohi Pandit oqaluttuarpoq. Taassuma ilisimatitsissutigaa suliniut soqutigineqarlualersimasoq, aningaasanillu tapiisoqarluartalersimalluni.

Angalaqqinnissaq

Aatsaat siullermeerluni Kalaallit Nunaanniinngilaq. Kulusumut siorna tikikkaluarpoq. Silarlunnerali pissutigalugu angalanini ingerlateqqissinnaasimanagu. Maannali Kulusumiit Nuummut sermersuaq qulaallugu timmisartorsinnaasimavoq.

- Ingerlavissara takisooq tulleq tassaavoq maanngaanniit Iqalunnut. Iqaluit silaqqisseriarpat aallartussaavunga, oqarpoq.

Kassaaluk Kristiansen

Silaqqilluinnarnissarlu pisariaqarluinnarpoq, timmisartuararmi aqutaa mikisunnguuvoq. Timmisartuaraq sportsflymik taaneqartarpoq, 472 kilonillu oqimaassuseqarluni. Ikannerpaamik marluk issimasuusinnaapput. Timmisartuaraq 4 meterit missaannik takissuseqarpoq. 60 liiterinik orsussaqarsinnaavoq, tankilu ulikkaaqqatillugu 1.000 kilometerit ingerlavigineqarsinnaallutik, timmisartuararmi silaannarmi aarsaarusaarsinnaavoq. Suluusai katillugit 15 meterisut takitigipput anorimiillu sunnertiasuaraallutik.

- Timmisartorneq sungiusimavara, aalagaluaraangallu merianngulerneq ajorlunga. Tamanna qujanaannarpoq, oqarpoq.

Oqariartuut

Taassuma neriuutigaa nunarsuaq tamakkerlugu arnat isumassarsitissinnaassallugit takorluukkaminnik anguniagaqaqqullugit.

- Sinnattorisinnaagukku, taava aamma angusinnaavat. Neriuppunga angalaninni arnat takutissinnaassallugit angorusutat anguneqarsinnaasut, ilungersorluni toraagaqarlunilu sulinikkut, erseqqissaavoq.

Aarohi Panditip naatsorsuutigaa ullualuit qaangiuppata aallaqqissalluni. Iqaluit alianaasseriarpat aallarnissamut akuerineqarnissani utaqqiinnarpaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER