Arnaq 92-inik ukiulik utoqqaat illuannit angerlartinneqartoq
Vilhelmine Lorentzen isigiarsungaatsiarpoq, tutsarluttuuvoq kræftimillu napparsimalersimalluni. Utoqqaat Illuannili eqqissisimaarfittut immikkoortortamit aamma angerlartinneqaqqammerpoq. Angerlartinneqarnera pillugu naammagittaalliuutigineqarsimasut suli kinguneqanngillat.
- Taava maaniiginnassaanga, toqusimaleruma akiarlunga annisissavaannga. 18-inilli ukioqarlunga sulisartunngorpunga, maannali utoqqalingama soorlu inuunngitsutut pineqarlunga. Naleqartinneqanngitsutut misiginaqaaq.
Vilhelmine Lorentzen 92-inik ukiulik Sermitsiaq.AG-mut oqarpoq.
Vilhelmine Lorentzen 92-inik ukioqartoq Nuummi inissiami najugaqarpoq. Isigiarsungaatsiarpoq, tutsarluttuullunilu. Qaratsamigut milikartoorami novemberimili kingunerluuteqarpoq, timaa pitsorluttunngorsimagami. Kræftimik napparsimavoq, katsorsarneqarsinnaanani. Utoqqaat Illuanilu qasuersaarfittut immikkoortortarmit pingasunngornermi 18. januar tungaanut najugaqareerluni, kissaatiginngikkaluarlugu angerlartinneqarsimavoq.
- Kisima angerlarsimanissara toqqissisimanarinngilara. Ilaqutaqarpunga, pisinnaagaangamillu ikiuuttarput. Kisianni paaqqutarineqartuarnissara pisariaqartikkaluarpara, taliga nioralu saamerleq iluamik atorsinnaanngilakka milikartoornerma kingorna, Vilhelmine Lorentzen oqaluttuarpoq.
- Utoqqaat taama pineqartussaanngikkaluarput, kommunip sorliilluunniit utoqqaat uattulli pisussaanngilai, oqarpoq.
Tusarnaarneqanngitsoq
Vilhelmine Lorentzenip oqaluttuarnerata nalaani mobilia nippaarilluni sianerpoq. Tusaanngimmaguli ernutaata mobil sianertoq tiguaa. Vilhelmine Lorentzen aamma nammineerluni sianersinnaasanngilaq, oqarasuaatip angallattakkap toortaatai isigiarsunnermini takusinnaannginnamigit.
Tusartaataata illuani batteria ernutaata taarserpaa, tusaalluarnerulaarsinnaaniassammat.
- Apeqqutitit nippaarillutit oqaatigisariaqarpatit. Taamaaliunngikkuit tusaajunnanngilakkit, oqarpoq.
- Inuunerma sinnerani utoqqaat illuanniikkusukkaluarpunga, aamma najorneqarnera utoqqaqatikkalu ilagineri nuannarigaluarakku. Tusaaneqanngilangali, nammineertussanngortiinnarneqarlungalu. Soorlu inuttut naleqartinneqarnanga, Vilhelmine Lorentzen oqarpoq.
Naammagittaalliuutip tulliata akineqarnissaat utaqqigaat
Ilaqutariit kommunimut aamma Isumaginninnermi Naammagittaalliuteqartarfimmut naammagittaalliuuteqarsimapput. Isumaginninnermi Naammagittaalliuteqartarfimmut naammagittaalliuutigineqarsimasoq Sermitsiaq.AG-p allaganngorlugu pivaa. Tassani ilaqutaasut erseqqissarpaat utoqqarni najugaqalivinnissap tungaanut Vilhelmine Lorentzenip utoqqaat illuani eqqissisimaarfittut immikkoortortamiiginnarnissani kissaatigigaluaraa.
Naammagittaalliuutit akineqarnissaat ilaqutaasut suli utaqqivaat, Vilhelmine Lorentzenillu utoqqaat illuani ineqaannarnissaanut piumasaqarneq pillugu saaffiginnissut aamma akissiillugu.
Suliaq pillugu, kiisalu qanoq ilisoqartillugu utoqqaat illuanni inissaqartitsisoqalertarneq pillugu Sermitsiaq.AG kommunimut oqaaseqartitsiniaavoq.