Arnap suliami Umbrellamik taaneqarsimasumiittup videomik siammarterineq unitsikkusukkaa
Suliami Umbrellamik taaneqartumi nutaanik unnerluutiginnittoqarnera arnap pinerlineqarsimasup sakkortuumik qisuariaateqarfigigai, illersuisussaatitaasua oqarpoq. Politiit inuit videomik siammarterisimasutut pillugit 148-nik ataasinngormat unnerluutiginneqqipput.
Suliami Umbrellami inuk piumanani qitiutinneqartoq sakkortuumik eqqorneqarpoq, arnarmi tamataqanngitsoq pillugu peqatiminit tamataqanngitsumit sakkortuumik pineqarnerani 2015-imi filmiliarineqarsimavoq, immiussarlu suli siammarneqartarluni.
Arnap inuusuttup illersuisussaatitaasua, Miriam Michaelsen, politiit ataasinngornermi inunnik videomik nittartakkakkut siammarterisutut 148-nik nutaanik unnerluussereersullu oqaluttuarpoq.
- Sakkortuumik eqqorneqarpoq, Umbrellamilu arnatut peqataasimasutut taaneqartarunnaarusuppoq inuuninilu ingerlateqqiinnarusukkaluarlugu, illersuisussaatitaasua oqarpoq.
Arnaq taamani 15-inik ukioqartoq, martsimi 2015-imi peqatiminit pinngitsaalineqartoq filmiliarineqarsimavoq.
Pisup nalaani nukappiaqqat pingasut takkupput filmiliulerlutillu. Pisoq Red Barnetip “Danmarkimi kinguaassiutitigut kannguttaatsuliornerit sakkortunerpaattut filmiliarineqartutut” kingorna taavaa.
Siorna januaarimi inuusuttut 1.000-it sinneqartut videomik nittartakkatigut siammarterisimasutut unnerluutigineqarput. Taakkunani ataaseq Kalaallit Nunaanneersuulluni.
Facebookillu amerikami oqartussanut nalunaarutiginninnerata kingorna, taamatullu suliat Europolimut ingerlateqqinneqareernerata kingorna, politiit 148-nik nutaanik unnerluutiginneqqipput.
Miriam Michaelsen nammineq oqarnermisut suliami attuumassuteqaqataavoq.
IT-mimi immikkut ilisimasaqarluartumik atorfinitsitsisimavoq, suliakkerlugulu nittartakkani inuit attaveqatigiittarfiini videomik siammarterisunik ujaasisussanngorlugu.
Naammattoorsigaangamik politiinut nalunaarutiginnittarput.
- Tamanna soorunami pineqartumut ilisimatitsissutigereerpaara, siullermillu oqaraluarpoq: Taama isiortariaqarpugut?
- Nammineerluni soqutiginngilaa amerlanerit unnerluutigineqassasut, namminermi soqutigisaraa video taanna siammarterneqarunnaassasoq, Miriam Michaelsen oqarpoq.
Pinerlineqartoq siornatigut nutaarsiassatigut saqqummereernikuuvoq oqaluttuarlunilu videomi atini tamakkerlugu taaneqarsimanerata kingunerisaanik arlaleriarluni atuarfimmut allamut nuuttariaqartarsimalluni.
Isumatsassimangaarnermik sinissaaruttarnermillu maanna ilungersuuteqarpoq.
Inuusuttut arfineq-pingasut videomik siammarterinerup kinguneranik paarnaarussivimmiittussanngorlugit pineqaatissinneqarsimalerput.
Siammarterinerup kinguneranik inuit 1150-it missaat unnerluutigineqarsimalerlutik.
Unnerluutigineqartuni 148-ni nutaani Kalaallit Nunaanneersoqanngilaq.