Arnanumi "nerisartakkagut" ukkatarineqarput

Arnanumi saqqummeqqammersumi sammisaq tassaavoq nerisassat. Ilaatigut Evi aamma Jaaku pillugit atuarsinnaavutit. Taakku neqinik aalisakkanillu pisiniarfinni qaqutiguinnaq pisisarput.

- Piffissat ilaanni ilinniarninnut atatillugu sivisuumik Danmarkimiippunga, taamani nerigaluarlunga nerigaluarlunga allaanngilaq timera naammatsinneq ajortoq. Taava uima kalaaliminernik Nuummiit nassippaanga nerigakkillu allaanngilaq timera kiisami eqqissisoq kimeqarluartunillu nerisimasoq, taama oqarpoq Nuummi najugalik 41-nik ukiulik Evi Kreutzmann.

Arnanut taama allappoq.

Evi uinilu Jakob Mølgaard 2002-mi Kangerlussuarmi naapipput, Jaaku timmisartortartut sulitillugu Evilu trafikassistentitut sulitillugu.

Jaaku timmisartorluni angalanngikkaangami pinialunnermik aallutaqartarpoq. Piniagassat assigiinngitsorpassuit pisarisarpai, taakkulu ilaqutariit ukioq naallugu inuussutigisarpaat.

- Tallimanik qerititsiveqarpugut, sisamat qerititsiviit kipparissut ataaserlu skabsfryseri, aappariit unnersiorput.

Jaaku pisaqarsimalluni tikikkaangat marluullutik ikioqatigiillutik pisai immikkoortitertarpaat. Neqit immikkut, aalisakkat immikkut grønsagillu immikkut iliorarneqartarput, taamaalillutillu qerititsiviit ulikkaarneqartarput ukiussamut naammattussanik.

- Taamaalillunga sapaatip-akunneranut naammattumik igaassanik pilersaarusioreersinnaalertarpunga. Uagutsinnummi pingaartuuvoq nerisatta assigiiaannginnissaat, Evi oqarpoq.

Jaaku siorna tuttunik arfineq-marlunnik pisaqarpoq, nalinginnaasumik minnerpaamik ukiumut quleraartaraluartoq. Taamaammallu qerititsivimminni neqinik aserortikkanik pisarnermit nunguutsiaarnerupput, ullullu ilaanni Evi pisiniarfimmi neqimik avataaniit tikisitamik aserortikkamik pisivoq, meeraasali erngerlutik mamassusaata allaanerunera malugaat.

- Qitornatta erngerlutik malugaat naammagittaalliulerpullu oqarlutik kingorna taamaattumik neqimik piseqqissanngitsugut, Evi illarluni oqarpoq.

Nerisassat pillugit sammisami allaaserisat tamakkerlugit Arnanumi nutaami atuarsinnaavatit. Arnanut pisiniarfinni pisiarineqarsinnaavoq. Aviisi uani pisiariuk:

Powered by Labrador CMS