Arnanumi arnat oqallittut: Trumpip pisiumanera aamma ajungitsunik nassataqarpoq
Trumpip pisiaqarusunnera kinguneqarluarsimava? Arnanummi arnat oqallittut taamatut isumaqarput, peqatigitilluguli silatusaartumik iliuuseqartoqarnissaa piffissarlu ungasinnerusoq eqqarsaatigalugu pilersaarusiortoqarnissaa kaammattuutigaat.
Arnanut-mi arnat oqallittarfiani pisimasut annertuut annikitsullu tamatigut isummersorfigineqartarput, Arnanummi maanna saqqummersinneqartumi Trumpip pisiaqarusunnera oqaaseqarfigineqarpoq.
Tusagassiortup Paornánguaq Kleistip pisoq Naalagaaffeqatigiinni nunanilu tamalaani oqaluuserisassatsialaanerarpaa, qullersaqarfimmi allatsi Heidi Møller Isaksen isumaqarpoq tamatuma malitsigisaanik nunarsuarmiut tamarmik Kalaallit Nunaat ilisimasaqarfigileraat.
- Taamaattariaqalivikkami, taanna ilanngussilluni oqarpoq.
Uiloq Slettemark isumaqataavoq:
- Trump ajunngeqigami, eqqumiikajaartuunera kialluunniit allanngortissinnaanngilaa, qujassutissaqarfigaarpullugu Kalaallit Nunaata ”ilisimaneqaleriasaarneranut”, taanna oqapoq.
Arnat oqallittarfiani peqataasartut arlallit isumaqarput, Trump pillugu suliaq pitsaasumik aallartitsinissamut atorneqarsinnaasoq:
- Silap pissusaata allanngoriartornera aatsaat taamak sammineqartigaaq, minnerunngitsumik Issittumi sila, aamma Danmark siullermeerluni avatangiisinik mingutsitsinnginnissamik anguniagartunik naalakkersuisoqalerpoq, taamaammat inuussutissarsiornerup ineriartortinneqarnissaa, suliffeqarfiit pilersinneqarnissaat taamalu Nunatta Karsiani akileraarutitigut isertitaqarnerulernissaq siunertaralugit suleqatigiinnerput pitsanngorsartariaqarparput, Nini Almgren-Jensen oqarpoq.
Arnalli oqallittarfianni peqataasut arlallit siunissami isumatusaartoqarnissaanut kammattuipput:
- Nunatut piffissaq ungasinnerusoq eqqarsaatigalugu eqqarsaasersortariaqalerpugut, qinersinermiit qinersinermut taamaallaat pisarani, piffissarli ungasinnerusoq eqqarsaatigalugu nukittoqqutissatsinnik aaqqiissutissarsiorlutalu periarfissarsiortariaqarpugut, tassa suli nukittunerulernissarput patajaannerulernissarpullu anguniarlugit – taamaalilluta tunineqarsinnaanerput oqaluusereqqissanngilarput, eqqumiitsuliortoq Lisbeth Karline Poulsen oqarpoq.
Unicefimi suliniutinut pisortaq Sara Olsvig isumaqarpoq, sammineqartoq tunngavissiisoq Kalaallit Nunaata siunissami sakkutooqalersinnaanerata oqaluuserineqarnissaanut.
- Isumanga malillugu Kalaallit Nunaata Amerikamut ilanngukkusunneqarneranut aningaasarsiornikkut periarfissat kisimik eqqarsaatigineqanngitsut, aammali USA-p Issittumi sakkulersoqqinnissamik pisariaqartitsinera eqqarsaatigineqartoq. Taamaammat sakkutooqarnikkut annertusaanermut peqataarusunnerluta innuttaasutut politikkikkullu oqallinneq ingerlaannaq aallartittariaqarparput, taanna oqarpoq.
Arnanut saqqummeqqammersoq pisiniarfinni linkiluunniit tulliuttoq aqqutigalugu pisiarineqarsinnaavoq: