suliffiit
Arnakkuluk Jo Kleist Tele-Postimi qaffasissumik atorfinippoq
Arctic Winter Gamesimi pisortamut tullersortaasimasoq attaveqaqatigiinnermut pisortanngorpoq
Arnakkuluk Jo Kleist 1. oktober Tele-Postimi attaveqaqatigiinnermut pisortatut sulilissaaq, suliffeqarfik Namminersorlutik Oqartussanit pigineqartoq ilisimatitsivoq.
Arnakkuluk Jo Kleist ukiut kingulliit Arctic Winter Games 2016-ip ingerlanneqarnerani pisortamut tullersortaanermigut siuttut ilagisimavai ilaatigut AWG-qanerani attaveqaqatigiinnermut akisussaassuulluni. Tamanna sioqqullugu Arnakkuluk Kommuneqarfik Sermersuumi attaveqaqatigiinnermik sulisutut atorfeqarpoq.
Atuaruk: Nina aamma Arnakkuluk Røde Korsimut 42.000 koruuninik katersisimapput
Napparsimasoq
Arnakkuluk Jo Kleistip attaveqaqatigiinnermik pisortatut atorfeqalernermini Ivalo Egede kingoraassavaa, taanna napparsimaneq pissutigalugu atorfimminit tunuarnissamik kissaateqarmat.
Ukiup affaa kingulleq Anne Rønne Tele-Postimi attaveqaqatigiinnerup pilersaarusiorluakkamik ingerlanneqarneranik isumaginnittuuvoq.
Marlunnik oqaaseqartoq
- Ilinniarsimalluarsimasumik misilittagalimmillu inuusuttumik attaveqaqatigiinnermut atorfiup inuttalernissaa iluatsissimagatsigu nuannaarutigeqaara, pisortaaneq Kristian Reinert Davidsen oqarpoq.
- Arnakkuluk Jo Kleist Roskilde Universitetimit attaveqaqatigiinnermut kandidatitut naammassinikuuvoq, AWG-llu nalaani sulilluarnermik takutitsinermi saniatigut oqaatsinik marluinnik atuisinnaanini nukittussutigaa, tamannami uagut suliffeqarfitsinni pingaaruteqarluinnarpoq. Uanga Savalimmiuneerpunga, kalaallilli oqaasiinik atuisinnaananga. Arnakkuluup suleqatiginissaa qilanaareqaara, taanna tusagassiuutinut nalunaarummi oqarpoq.
Atuaruk: AWG 2016-mi siuttussat aajuku