Arlalinnut qinersineq: Qinigaaffinnut arlalinnut sassartut iluanaarsinnaapput
Politikerit kommuninut Inatsisartunullu sassarniarlutik aalajangertut qinersinissap tungaanut nittarsaannerunissamik periarfissaqarput. Qinersivinni marlunni ati krydsiligassaq ersippat, qinersisartut marluusuni assigiimmik krydsiliinissaat ilimanaateqarluarpoq, ilisimatusartoq isumaqarpoq.
Inatsisartuni qinersinermi ati ataaseq krydsileruk. Qinersivissamut allamut krydsiliiffissaq tigujuk. Ati taannarpiaq ujaruk, krydsilerlugulu.
Inatsisartunut, kommuninut nunaqarfinnilu aqutsisunut aprilip arfernani qinersisoqalerpat arlalinnut sassartut taajuunneqarneri taama peratarsinnaapput. Imaanngilarli arlalinnut qineqqusaartut taajuunneqarnerussasut, assigiimmilli qinersiseqarsinnaapput.
Inatsisartunut qinersinissap sammisat kommuninut tunngassuteqartut ipisissinnaagaluarai, taamaattoq politikerit Inatsisartunut kommuninullu assigiimmik sassartut qineqqusaarluarnissaminnut periarfissaqarsinnaasut, qinersinerit pillugit ilisimatusaetoq naliliivoq:
- Marloqiusamik qinigaaffeqarniarlutik sassartut qineqqusaarluarnissaminnut periarfissaqarput, ersarinnerunissamullu periarfissinneqarlutik, qinersinerit pillugit ilisimatusartoq aamma Københavnip Universitetiani Institut for Statskundskabimi professori, Kasper Møller Hansen nassuiaavoq nangilluni:
- Qinersisartut periarfissinneqassapput qinigaaffinni assigiinngitsuni inummik ataatsimik taasisinnaallutik, tamanna eqqaamanissamut periarfissiivoq. Qinersinernilu assigiimmik taasaqarneq ilimanaateqarluarpoq, Kasper Møller Hansen Sermitsiaq.AG-mut nassuiaavoq.
Qineqqusaartut namminneq akisussaaffiat
Siumut november 2020 ataatsimeersuarami marloqiusanik qinigaaffeqartarneq periarfissatut ammaateqqissallugu aalajangerpoq.
Partiinut allanut paasiniaanerup takutippaa sammisami partiit isumaqatigiilluinnartut. Inatsisartunut aamma kommunalbestyrelsemut marloqiusamik qinigaaffeqarnissaq ajunngilaq, akisussaaffimmik kivitsisinnaagaanni, suliassanillu naammassinnissinnaagaanni.
Nunatta Qitornaanit Aleqa Hammondip ima nassuiarpaa:
- Marloqiusamik qinigaaffeqarnissaq periarfissaavoq. Suliassat kivissinnaagaanni aamma innuttaasunut sullissinissamut kajumissuseqarluaraanni taamaaliortoqarsinnaavoqm imminuinnaq pinnani, Aleqa Hammond (NQ) Sermitsiaq.AG-mut oqarpoq.
Inuit Ataqatigiit, Demokraatit, Naleraq aamma Atassut ersarilluinnartumik oqariartuuteqarput, marloqiusamik qinigaaffeqarnissamut sassarnissamik aalajangerneq qineqqusaartup nammineq akisussaaffigissagaa. Sermitsiaq.AG-p sammisaq pillugu Suleqatigiissitsisut oqaaseqartikkumagaluarpaa, iluatsinngitsumilli.
- Marloqiusamik qinigaaffeqarniarluni sassartup nammineq akisussaaffigissavaa qinersisartut nassuiaatissallugit sooq marloqiusamik qinigaaffeqassalluni sassarnerluni. Kiffaanngissutsimiippoq marloqiusamik qinigaaffeqarnissaq, IA-mi siulittaasoq Múte B. Egede oqarpoq.
Qineqqusaarnermi ulapinneq
Qineqqusaarnerilli marluutillugit ingerlanneqarnissaat partiinut, pingaartumillu marloqiusamik qinigaaffeqarumallutik sassartunut ulapinnangaatsiarsinnaavoq. Qineqqusaarnernut tamanut piffissaq nukiillu annertuut atorneqartariaqassapput.
- Politikerilli qineqqusaarnernut marlunnut pitsaasumik qineqqusaarluarsinnaaguni, tamanna iluaqutaaginnassaaq. Qineqqusaarnernili najukkami sammisassat aallunniarneri ajornakusooratarsinnaapput, nuna tamakkerlugu politikki initunerulersinnaammat, qinersisarneq pillugu ilisimatusartoq oqarpoq.
Taassuma ilanngullugu erseqqissarpaa qineqqusaarngaartussat sassarterluarnissaminnut unammillerneqangaatsiartussaasut, politikerit ilisarnarnerusut qinersisartunit eqqaamaneqarnerusarmata.