siulittaasunngorniuunneq
Arlalinnit Lars-Emil Johansen siulittaasussatut piukkunneqarpoq
Siumut Nuuk aamma Aasiaat Lars-Emil Johansenimut Siumumi siulittaasussatut sassarnissaanut kaammattuipput. Uummannaq aamma piareersimavoq Lars-Emil Johansenimut taasinissaminut
Siumup partiianik pilersitseqataasoq, Lars-Emil Johansen, aviisimut AG-mut sap. ak. kingulleq oqaluttuarpoq Siumumi siulittaasussatut sassarnissani isumaliutersuutigigini. Kisianni siulittaasussarsiornissaq ullormik sioqqullugu sassarniarnerluni suli nalunaaruteqanngilaq.
Maannalu Lars-Emil Johansen Siumumi siulittaasussatut piukkunneqarluni sassarnissaminut kaammattorneqarpoq Siumup Nuummi Aasiannilu immikkoortortaqarfianit.
- Siumut Nuup siulittaasussarsiornermi pingaartilluinnarpaa partiimi akisussaassuseqartumik aammalu misilittagalimmik siuttoqarnissaq, Siumut Nuup siulittaasua, Mette Larsen Rasmussen, tusagassiuutinut taama allappoq.
Kinguaariit nikissinnaanerat aamma Siumut Nuup eqqarsaatigineqarsimavoq, kisianni:
- Tamanna assortorneqarsinnaanngilluinnarpoq ullumikkulliuna Siumup inissisimanerani misilittagartuumik aammalu suliassanik agguataarilluarsinnaasumik minnerunngitsumillu politikikkut annertuumik misilittagalimmik Siumut pisariaqartitsisoq.
- Siumut Nuup suliassamut imaannaanngitsumut kivitsisinnaasutut Lars Emil Johansen nalilerlugu siulittaasutut qinigassanngortissinnaanissaanut kaammattorpaa, Siumut Nuuk, Lars-Emil Johansenip kaammattorneqarnerminik tigusilluarnissaanik neriuuteqartoq, taama allappoq.
Atuaruk: Politikkimut naliliisartoq: Lars-Emilip inuusuttut qimaatissinnaavai
Atuaruk: Lars-Emil suli utaqqisitsivoq
Aamma Siumut Aasianniit Lars-Emil Johansen partiimi siuttuulernissaa kissaatigineqarpoq:
- Kikkunnit tamanit katersuuffigineqarsinnaavoq. Partiimi aamma partiinit allanit. Aamma misilittagaqarpoq. Taamaammat Siumut Aasiaat ilaasortaasa amerlanerit Lars-Emil Johansen siulittaasutut sassarnissaanut kaammattorpaat, Enok Sandgreen Siumut Aasiaat siulittaasuat Sermitsiaq.AG-mut taama oqarpoq.
Siumut Sisimiut aamma Ilulissat qineqqusaartut takoqqaarusuppaat
Siumut Sisimiuni aamma Ilulissani immikkoortortaqarfiisa maanna oqaatigisinnaanngilaat kina siulittaasussatut piukkunnerlugu.
- Qinigassanngortittut qineqqusaarutaat aqagu tusaqqaarusuppagut, immikkoortortaqarfiit siulittaasui Sermitsiaq.AG-mut oqarput.
Siumut Uummannaq Lars-Emil Johansenimut taasinissaminut piareersimavoq
Kisianni Uummannami immikkoortortaqarfik Lars-Emil Johansenimut taasinissaminut piareersimavoq, taanna Siumumi siulittaasussatut sassarniarluni aalajangeriataassangaluarpat.
- Massakkut siulittaasussatut sassartut tamarmik piukkunnarput. Aamma toqqaakannereernikuuvugut taakkunani kina qinerusunnerlutigu. Kisianni Lars-Emil Johansen sassassangaluarpat aamma isummatta allanngortinnissaanut piareersimavugut, Jakob Kruse Uummannami Siumup siulittaasua oqarpoq.
Siumut Qaqortup Tamanut Kujataani aqqutigalugu nalunaarutigineqareernikuuvaa Kim Kielseni tapersersorneqartoq Qaqortumit.
Aaqqissuisoqarfik Lars-Emil Johansenimut, Sisimiuniit Nuummut unnummut tikinnissaminut naatsorsuuteqartumut, oqaaseqartitsiniaraluarami iluatsitsinngilaq.
Lars-Emil Johansenip Siumumi siulittaasussatut sassarsinnaanerminut pingasunngornermi aperineqarami akissutituarisaa naatsoq imaappoq:
- Piareeruma nalunaaruteqarumaarpunga.
Uani Siumumi siulittaasunngorniunnermut allaaserisat marluk atuarsinnaavatit, aamma Kommune Kujallermi pisartut pillugit Tamanut Kujataanimi atuarneqarsinnaapput. Aviisi akeqanngitsumik ataani aaneqarsinnaavoq: