Arktisk Kommandop akiuussutissanik angallassinera iluatsilluartoq
Paamiuni innuttaasut 223-it, taakkunannga 65-ileereersimasut amerlanerullutik, aamma Qeqertarsuatsiaanni innuttaasut 16-ileereersimasut 90-it coronavirusimut akiuussutissamik siullermeerlutik kapitipput Arktisk Kommandop najukkanut minnerusunut assartuilluni ikiuuterngaarnerani.
Anori immallu mallernerujussua aporfiginagit, Arktisk Kommandop nakkutilliiartorluni umiarsuaa, Knud Rasmussen covid-19-imut akiuussutissanik usilluni Paamiunut Qeqertarsuatsiaannullu tikiussivoq.
Paamiuni innuttaasut 223-it aamma Qeqertarsuatsiaanni innuttaasut 16-ileereersimasut 90-it akiuussutissamik siullermeerlutik kaporneqarput, Arktisk Kommandop assartuilluni ikiuuteqqaarnerani.
- Kalaallit Nunaanni A-miit B-mut angalaniarneq qanoq ajornakusoorsinnaatiginersoq ilisimavara. Taamaammat Covid-19 akiorniarlugu iliuuseqaqataasinnaanerput periarfissatsialattut immikkuullarissutut isigaara, Knud Rasmussenimi pisortaq, orlogskaptajn Clemens Vest Hansen Arktisk Kommandop tusagassiorfinnut nalunaarutaani issuarneqarluni oqarpoq.
Suli angallasseqqissapput
Akiuussutissat nunatsinnut siaruartinnissaannut Arktisk Kommando siullermeerluni peqataavoq. Najugaqartut akiuussutissamik kaporneqarnissaannut periarfissiinerup saniatigut, umiarsuup peqqinnissaqarfimmilu sulisut suleqatigiinnerat misilerarneqarpoq.
Misileraanermi tikikkuminarnerusut, tassa Paamiut aamma Qeqertarsuatsiaat angallavigineqarput, najukkallu tikikkuminaannerusinnaasunut angalaneq sungiusaataalluni, Arktisk Kommando ilisimatitsivoq.
Akiuussutissat nillertorujussuarmiittussatut sanaajupput, immikkullu illuinnartumik passunneqartussaallutik. Peqqinnissaqarfimmi sulisut aalajangersimasut taamaammat covid-19-imut akiuussutissanik passussinissamut ilinniartinneqarsimapput, nunatsinnilu akiuussutissanik kapuinissamik suliaqartuullutik.
- Angalanitsinni ikiorneqarluarpugut. Sulinitsinni Nuummi Sanami suleriuserput atorsinnaasimavarput, qerititsivissuaq atorsinnaasarput angallanneqarmat. Pitsaanerusumik ingerlasinnaasimanngilaq, nunatta nakorsaataasiviani nakorsaataatilerisoq, Inge Mortensen, akiuussutissanillu kapuisartoq oqaluttuarpoq.
Innuttaasut angallammut ikisinnaasut
Arktisk Kommandop angallataa Knud Rasmussen nunatsinni illoqarfiit minnerit nunaqarfiillu arlallit tikittareerpai, sikulu 80 centimeterimik issutigisoq aserortersinnaallugu. Taamaammat akiuussutissat innuttaasunut tikisinnissaannut periarfissaqarluarpoq.
Najukkalli ilaat tulaffigineqarsinnaanngippata innuttaasut umiarsuarmut oqqunneqarsinnaanerat periarfissaavoq. Arktisk Kommandommi iluani napparsimmavimmi passussisarfittut ittunik ineeraqarpoq kapuisarfiusinnaasunik, Arktisk Kommando ilisimatitsivoq.
Paamiuni Qeqertarsuatsiaannilu akiuussutissamik kapitissimasut sapaatit akunneri arfinillit qaangiutsinnagit aappassaanik kapiteqqittussaapput. Kapuiartoqqinnissamut angallat nakkutilliaartortitaq alla, angallammilu sulisut nutaat peqataatinneqassasut, taamaaliornikkut Arktisk Kommandop akiuussutissanik oqqussinermik sungiusarnera nangittuuniassammat, pilersaarutaasoq Arktisk Kommando ilisimatitsivoq.
Angalaneq pillugu filmiliaq uani takuuk: